«Toshshahartransxizmat» 82-sonli avtobus bilan bogʻliq vaziyatga izoh berdi
82-sonli avtobus haydovchisi transport vositalarining toʻplanib qolgani sababli Mega Planet yaqinidagi belgilangan joyda toʻxtamagan. Tekshiruvdan soʻng u bilan suhbat oʻtkazildi.
Toshshahartransxizmat 82-sonli avtobus bilan bogʻliq vaziyatga izoh berdi
«Toshshahartransxizmat» AJ Toshkentning Yunusobod tumanidagi Mega Planet savdo-koʻngilochar majmuasi yaqinidagi bekatda 25 oktyabr kuni 82-sonli avtobusga chiqa olmagan yoʻlovchilarning murojaatiga munosabat bildirdi.
Tekshiruv shuni koʻrsatdiki haydovchi avtobuslar tirbandligi sababli belgilangan joydan tashqarida toʻxtagan. Bu haqda kompaniya axborot xizmati xabar bermoqda.
Gap 18-sonli avtobus parkiga biriktirilgan «Yunusobod 17-mavzesi — Ibn Sino 1-mavzesi» yoʻnalishi boʻyicha qatnaydigan YUTONG avtobusi haqida bormoqda.
29 oktyabr kuni «Yunusabadtsi_24» Telegram-kanalida eʼlon qilingan murojaat tekshiruvga sabab boʻlgan. Tekshiruv yakunlariga koʻra, bekatda avtobuslar soni koʻpligi sababli haydovchi transport vositasini nazarda tutilgan joydan bir oz nariroqda toʻxtatgani aniqlandi. Shu sababli kutayotgan yoʻlovchilarning bir qismi salonga kira olmagan.
Haydovchi bilan tushuntirish ishlari olib borildi. Unga xizmat koʻrsatish standartlariga rioya qilish, xavfsizlik talablariga rioya qilgan holda belgilangan joylarda toʻxtash hamda yoʻlovchilarga chiqish va tushish uchun sharoit yaratish zarurligi eslatildi.
Toshshahartransxizmat haydovchilar tomonidan yoʻlovchilarga xizmat koʻrsatish qoidalariga rioya etilishini nazorat qilayotganini va bu kabi holatlarning oldini olish boʻyicha choralar koʻrayotganini maʼlum qildi.