Toshkentning yana 302 ta maktabida «AI Attendance» tizimi va aqlli kameralar joriy etiladi
Toshkentdagi maktablarda davomatni nazorat qilishning SI Davomat (AI Attendance) tizimini yana 302 ta maktabga kengaytirish rejalashtirilmoqda. Hozirda u Sergeli tumanidagi 26 ta maktabda sinovdan oʻtkazilmoqda, u yerda 446 ta aqlli kamera oʻrnatilgan.
Toshkentning yana 302 ta maktabida «AI Davomat» tizimi va aqlli kameralar joriy etiladi
Toshkentdagi «SI Davomat» («AI Davomat») maktab davomatini monitoring qilish tizimi 2027–2028 yillarda yana 302 ta maktabga kengaytirilishi rejalashtirilmoqda. Bu haqda poytaxt hokimining 6 oktyabrdagi farmoyishida aytiladi.
«Gazeta» avvalroq ushbu tizim Sergeli tumanidagi 26 ta maktabda sinovdan oʻtkazilayotgani, u yerda 446 ta aqlli kamera oʻrnatilgani haqida xabar bergan edi. Pilot loyiha natijalari tizimni shahardagi boshqa maktablarda bosqichma-bosqich joriy etish uchun asos boʻlishi kutilgan edi.
Shahar hokimligining bildirishicha, aqlli kameralar va Face ID texnologiyasi oʻquvchilarning maktabga kelishini va darsdagi davomatini qayd etish imkonini beradi.
«Bu mutaxassislarga sabablarni yanada sinchkovlik bilan oʻrganish, oilalar va maktablar bilan ishlash hamda bolalarga oʻz vaqtida zarur yordam koʻrsatish imkonini beradi», — deyiladi hokimlik xabarida.
Shuningdek, tizim nafaqat davomatni nazorat qilish, balki fanlar, sinflar va oʻqituvchilar kesimida darslarni tashkil etish, oʻquvchilarning jalb qilinganligi va oʻqitish metodlarini tahlil qilish uchun ham moʻljallangani taʼkidlandi.
Hokim farmoyishida Oʻzbekiston prezidentining 4 sentyabrdagi Toshkent shahridagi umumtaʼlim maktablarida davomatni yaxshilash va tizimni barcha maktablarga kengaytirishga qaratilgan topshiriqlari aks etgan bayonnomaga havola qilingan.
Hozirda Toshkentda 500 dan ortiq davlat va 150 ga yaqin xususiy maktab faoliyat yuritmoqda.