Toshkentning ikki tumanida kechgacha gaz oʻchiriladi

1 soat oldin

Bugun, 15 oktyabr kuni Toshkentning Mirzo Ulugʻbek va Uchtepa tumanlarida tabiiy gaz yetkazib berish vaqtincha toʻxtatiladi. Cheklovlar gaz quvurlarini xavfsiz joylarga koʻchirish bilan bogʻliq.

"Hududgaz Poytaxt" filiali matbuot xizmati xabariga koʻra, Mirzo Ulugʻbek tumanida ishlar "Alisherobod" mahallasining Milliy bogʻ koʻchasida olib boriladi. Ishlar olib borilayotgan vaqtda, soat 10:00 dan 17:00 gacha toʻqqizta mahallada: "Geofizika", "Alisherobod", "Jasorat", "Iqtidor", "Zakovat", "Chingeldi", "Geologlar", "Temuriylar" va "Ijodkor"da gaz oʻchiriladi.

Cheklovlar 4,5 mingdan ortiq hovli uylarga, 33 ta koʻp qavatli uydagi 960 ta xonadonga va 46 ta ulgurji isteʼmolchiga taʼsir qiladi.

Uchtepa tumanida ishlar "Nurobod" mahallasi hududida amalga oshiriladi. U yerda diametri 76 va 57 millimetr boʻlgan yer osti gaz quvurlarining uchastkalari aholi turar joylari va bolalar maydonchasidan uzoqda joylashgan xavfsiz joyga koʻchiriladi.

Gaz yetkazib berish soat 10:00 dan 19:00 gacha "Nurobod" va "Hamdoʻst" mahallalarida toʻxtatiladi. 70 ta hovli uy, koʻp qavatli binolardagi 1,3 mingta xonadon aholisi va 14 ta ulgurji isteʼmolchi vaqtincha gazsiz qoladi.

Taʼmirlash ishlari yakunlangach, gaz yetkazib berish bosqichma-bosqich tiklanadi.