«Toshkentning har bir tuman hokimi ikkitadan savdo majmuasi yoki moll tashkil etishi kerak» — prezident
Toshkentning 12 ta tumani hokimlari 1 oktyabrga qadar yirik savdo majmualari va molllar uchun maydonlar, investorlar va moliyalashtirish manbalarini belgilashi kerak. Bunga parallel ravishda, rasmiylar «Kichkirik» namunasi asosida 400 ta mahallani obodonlashtirishni va bunga 10 trln soʻm yoʻnaltirishni rejalashtirmoqda.
«Toshkentning har bir tuman hokimi ikkitadan savdo majmuasi yoki moll tashkil etishi kerak» — prezident
Prezident Shavkat Mirziyoyev Olmazor tumanidagi «Kichkirik» mahallasi namunasida Toshkentning 400 ta mahallasini obodonlashtirish boʻyicha toʻrt yillik dastur ishlab chiqishni topshirdi. Bu maqsadlarga 10 trln soʻm yoʻnaltirish rejalashtirilmoqda. Bu haqda davlat rahbari 11 sentyabr kuni boʻlib oʻtgan yigʻilishda maʼlum qildi.
Uning soʻzlariga koʻra, hozirgi sharoitda har bir tuman va mahallaning salohiyatidan yanada faolroq foydalanish, investitsiyalar, qoʻshilgan qiymat va yuqori daromadli ish oʻrinlari sonini koʻpaytirish zarur.
«Har bir tuman hokimi oʻz hududida aholi va turistlarni magnitdek oʻziga tortadigan ikkitadan yirik savdo majmuasi yoki moll tashkil etishi kerak», — dedi Shavkat Mirziyoyev «Uzbekistan 24» telekanali lavhasida.
U Toshkent shahar hokimi Shavkat Umurzoqov va 12 ta tuman hokimlariga 1 oktyabrga qadar aniq maydonlar, investorlar va moliyalashtirish manbalarini belgilashni topshirdi.
«Toshkent hamma uchun — barcha sohalarda namuna boʻlishi kerak», — dedi prezident.
Mirziyoyev Olmazor tumanidagi oʻzgarishlarga alohida toʻxtalib oʻtdi. Uning soʻzlariga koʻra, yil boshidan buyon bu yerda 1000 ga yaqin yangi tadbirkor paydo boʻlgan, ularning umumiy soni esa 12 mingga yaqinni tashkil etadi.
«Agar tuman hokimi Qudratilla Toʻlaganov har kuni 50−60 tadbirkor bilan gaplashsa, biznes kengayadi, ishsizlar esa daromad olish imkoniyatiga ega boʻladi», — dedi u.
Prezident topshiriqlaridan soʻng tumandagi toʻqqizta koʻcha obodonlashtirildi va davlat rahbarining baholashicha, biznes, aholi va turistlar uchun yanada jozibador boʻldi.
Mirziyoyev, shuningdek, «Kichkirik» mahallasiga tashrifi haqida gapirib berdi.
«Ilgari aholi ishdan keyin sayr qilmoqchi boʻlsa, u yerda deyarli birorta ham normal piyodalar yoʻlagi yoʻq edi, hamma joy qorongʻi edi. Ayniqsa, soy boʻyidagi hudud juda qarovsiz edi. Sanitariya va ekologik holat yomonligi sababli tadbirkorlar bu yerda biznes ochishga qiziqmasdi», — dedi prezident.
Qisqa vaqt ichida mahallada 450 oʻrinli bolalar bogʻchasi, sport maydonchalari, bogʻ, amfiteatr, piyodalar yoʻlaklari va favvoralar barpo etildi.
«Bugun bu ushbu mahallaning 5500 nafar aholisi kayfiyati va hayot sifatini qanchalik oʻzgartirganini oʻzim koʻrdim», — dedi Shavkat Mirziyoyev.
Olmazor tumani hokimi yil yakuniga qadar yana uchta koʻchani oʻzgartirishni rejalashtirgan edi, biroq prezident bu koʻrsatkichni yetarli emas deb atadi.
«Bu juda kam. Savol tugʻiladi: agar bu koʻchalar aholi, tadbirkorlar va turistlarga yoqayotgan boʻlsa, nega biz yana sakkizta koʻchani oʻzgartirish uchun keyingi yillarni kutishimiz kerak?» — dedi u.
Mirziyoyev Olmazor tumanidagi Talabalar, Chinboy, Ozod, Qorasaroy, Nurafshon, Sagʻbon, Oltinsoy va Gulsaroy koʻchalarida ishlarni ertadanoq boshlashni topshirdi.
Bundan tashqari, Toshkentning qolgan 11 ta tumanining har birida kamida besh-oltita koʻchada xuddi shunday ishlar boshlanishi kerak.
Prezidentning soʻzlariga koʻra, tuman hokimlari tomonidan taklif etilgan 100 ta koʻcha boʻyicha moliyalashtirish masalalari allaqachon hal etilgan va tegishli qaror qabul qilingan.
«[Iqtisodiyot va moliya vazirining birinchi oʻrinbosari Ilhom] Norqulov ertadan kechiktirmay moliyalashtirishni ochishi kerak. Tuman hokimlari kutib oʻtirmasdan — tadbirkorlar bilan birgalikda imkon qadar tezroq amaliy ishga oʻtishlari lozim», — dedi davlat rahbari.
Shavkat Mirziyoyev, shuningdek, bir hafta muddatda Kichkirik namunasida 400 ta mahallani obodonlashtirish boʻyicha toʻrt yillik dasturni tasdiqlashni topshirdi. «Bunga 10 trln soʻm ajratamiz», — dedi prezident.