Toshkentda yuzni tanish kamerasini sindirgan ikki erkak uch sutkaga qamaldi
Tashkent Times — Oʻzbekistonning barcha soʻnggi yangiliklarini yoritib boruvchi ingliz tilidagi onlayn-gazetadir
Toshkentda yuzni tanish kamerasini sindirgan ikki erkak uch sutkaga qamaldi
Toshkentning Chilonzor tumanidagi koʻp qavatli uyning kirish qismida joylashgan yuzni tanish kuzatuv kamerasining payxon qilinishiga aloqador uch nafar yosh yigit shaxsi aniqlandi, deb xabar berdi Toshkent shahar IIBB matbuot xizmati.
Hodisa yarim kechasi sodir boʻlgan, deyiladi xabarda. Erkaklarning ikkisi 2004 va 2005 yillarda tugʻilgan, uchinchisi esa voyaga yetmagan shaxsdir. Profilaktika inspektorining surishtiruvi davomida ularning ikkitasi spirtli ichimlik isteʼmol qilgani aniqlandi.
Maʼmuriy javobgarlik toʻgʻrisidagi kodeksning 183-moddasi (Mayda beboshlik) va 194-moddasi (Ichki ishlar organi xodimining qonuniy talablarini bajarmaslik) boʻyicha maʼmuriy bayonnoma tuzilib, sudga yuborildi. Jinoyat ishlari boʻyicha Chilonzor tuman sudi erkaklarning ikkitasiga uch sutkadan maʼmuriy qamoq jazosini tayinladi.
Voyaga yetmagan shaxsni maxsus nazoratga olish masalasini koʻrib chiqish uchun Toshkent shahar hokimligi huzuridagi Voyaga yetmaganlar ishlari boʻyicha komissiyaga taqdimnoma yuborildi.
Kamerani sindirganini aytgan erkak pushaymonligini bildirdi. «Qilgan ishimdan chin dildan pushaymonman. Bunaqa narsalar hech qachon jazosiz qolmas ekan», — dedi u. «Kamerani sindirib ketsangiz ham, baribir topishar ekan. Hammadan kechirim soʻrayman».