Toshkentda kuryerni haqoratlagan qorovul 10 sutkaga qamaldi
Toshkentda kuryerni haqorat qilgan qorovul 10 sutkaga qamaldi
Ijtimoiy tarmoqlarda kuryer bilan ko‘p qavatli uy qorovuli o‘rtasidagi mojaro aks etgan video tarqalib, keng muhokamalarga sabab bo‘ldi. Unda yetkazib berish xizmati xodimiga qo‘riqlash xodimi tomonidan jismoniy kuch ishlatilgani va haqorat qilingani ko‘rinadi. Ushbu holat yuzasidan Yunusobod tumanlararo sudida ish ko‘rib chiqildi.
Voqea 6-sentyabr kuni taxminan soat 14:30 larda Toshkent shahri Yunusobod tumani Bog‘iravon ko‘chasidagi ko‘p qavatli uylardan birining oldida yuz bergan. Sudda ma’lum bo‘lishicha, 20 yoshli kuryer navbatdagi buyurtmani yetkazish uchun shu manzilga borgan. U mijozga qo‘ng‘iroq qilib, buyurtmani olib ketish uchun pastga tushishini kutgan.
Kuryerning suddagi ko‘rsatmasiga ko‘ra, mijoz buyurtmani olib ketguniga qadar qorovul uni haqorat qilgan va boshidagi kepkasini olib, qaytarib bermagan. Shuningdek, qorovul uning qancha pul topishi haqida haqoratli ohangda gapirganini aytgan. Kuryer voqeani videoga olayotganini bildirganidan keyin ham tortishuv davom etgan.
Qorovul esa kuryerning binoga kirganini o‘z vazifasini bajarish jarayonida to‘xtatishga uringanini aytgan. Erkakning so‘zlariga ko‘ra, u kuryerga mijozga telefon qilib, tashqarida kutishini tushuntirgan. Biroq kuryer boshqa yashovchilar bilan birga binoga kirib ketgan. Shundan so‘ng jahli chiqib, kuryerga qattiq gapirganini va so‘kkanini tan olgan.
Sudda tomonlarning ko‘rsatmalari tinglandi. Holat yuzasidan qorovulga nisbatan Ma’muriy javobgarlik to‘g‘risidagi kodeksning 183-moddasi (mayda bezorilik) bilan ma’muriy bayonnoma rasmiylashtirilib, ish sudga yuborilgan.
Jinoyat ishlari bo‘yicha Yunusobod tuman sudi qorovulni mazkur huquqbuzarlikni sodir etgan deb topib, unga 10 sutka ma’muriy qamoq jazosi tayinladi.
Holat bo‘yicha ma’muriy ish rasmiylashtirilib, materiallar sudga yuborilgan.