Toshkentda talabalar turar joyi 195,7 mlrd soʻmga sotuvga qoʻyildi
Toshkentning Olmazor tumanida Toshkent davlat yuridik universitetining 1 gektar maydondagi yotoqxonasi auktsionga qoʻyildi. Obʼyekt 195,7 mlrd soʻmga baholanmoqda. Xaridor undan faqat u yerda joylashgan davlat tashkilotlari TDYUUning Yangi Toshkentdagi yangi kampusiga koʻchib oʻtganidan keyin foydalanishi mumkin boʻladi.
Toshkentda qiymati 195,7 mlrd soʻmlik talabalar yotoqxonasi sotuvga qoʻyildi
Oʻzbekiston Davlat aktivlarini boshqarish agentligi Toshkent shahrining Olmazor tumanidagi talabalar yotoqxonasi binosi sotilishini eʼlon qildi.
Obʼyekt Kichik halqa avtoulov yoʻli bilan kesishgan joy yaqinida, «Ziyo» mahallasi, Talabalar koʻchasi, 2-uy manzilida joylashgan. U toʻrtta talabalar yotoqxonasidan iborat majmua tarkibiga kiradi. Hozirda bu yerda Toshkent davlat yuridik universitetining 2-sonli yotoqxonasi joylashgan.
Bino va inshootlarning umumiy maydoni 8972 kv. m ni, yer maydoni esa 1,02 ga ni tashkil etadi. Obʼyekt suv taʼminoti, gaz, elektr taʼminoti va kanalizatsiyaga ulangan. Lot boʻyicha auktsion 4 noyabr kuni soat 10:00 ga belgilangan.
Obʼyektning boshlangʻich narxi — 195,66 mlrd soʻm, zakalat miqdori — 5,87 mlrd soʻm boʻlib, bu boshlangʻich qiymatning 3% ini tashkil qiladi.
Xususiylashtirishga Vazirlar Mahkamasining 2026 yil 2 iyuldagi 361-sonli qarori asos boʻldi. Ushbu hujjat yopiq holda qabul qilingan va lex.uz qonunchilik bazasida mavjud emas.
Sotuvning asosiy shartlaridan biri obʼyektni yangi egasiga topshirishni kechiktirish hisoblanadi.
Eʼlonda koʻrsatilishicha, binolardan foydalanayotgan davlat tashkilotlari Toshkent davlat yuridik universitetining (TDYUU) zamonaviy kampusiga koʻchib oʻtganidan keyin ularni boʻshatib berishi kerak.
Faqat shundan keyingina obʼyekt xaridorga topshiriladi va u koʻchmas mulkdan foydalanish huquqiga ega boʻladi. Shu bilan birga, auktsion shartlarida binoning aniq qachon boʻshatilishi koʻrsatilmagan.
Toshkent davlat yuridik universitetining yangi kampusi qurilishi prezidentning 2025 yil 26 noyabrdagi farmonida nazarda tutilgan.
Hujjatga koʻra, universitet Yangi Toshkent hududida zamonaviy kampusga ega boʻlishi kerak. Loyihani amalga oshirish uchun xalqaro moliya institutlari, xorijiy banklar va qurilish kompaniyalari mablagʻlarini jalb qilish rejalashtirilmoqda. Loyihalash va qurilish ishlari 2025−2028 yillarga moʻljallangan.
2026 yil 17 oktyabr kuni Yangi Toshkentda Adliya vazirligi va TDYUUning yangi binolari poydevoriga tamal toshi qoʻyish marosimi boʻlib oʻtdi. Tadbirda adliya vaziri Akbar Toshqulov ishtirok etdi.
Toshkent davlat yuridik universitetining (TDYUU) amaldagi kampuslari hududida Oʻzbekiston huquq tarixi muzeyi, Oʻzbekiston nizolarni hal etish markazi, shuningdek, universitet huzuridagi Raqamli huquq va raqamli sud ekspertizasi markazlarini joylashtirish rejalashtirilmoqda.