Toshkentda sayyohlik agentligi xodimi Slovakiyaga ishchi vizalarini sotgan

Toshkentning Chilonzor tumanida tegishli vakolatga ega boʻlmay turib, Samarqand viloyatida yashovchi fuqaroga ishchi vizasini rasmiylashtirib berish va uni Slovakiyaga ishga yuborishni vaʼda qilgan turistik firma menejeri qoʻlga olindi. Erkak oʻz xizmatlari evaziga 3 ming dollar va 2,5 million soʻm talab qilgan.

Davlat xavfsizlik xizmati xabariga koʻra, menejer Oʻzbekiston fuqarolarini xorijga ishga yuborishda vositachilik qilish huquqiga ega boʻlmagan.

Kelishilgan summaning bir qismi — 1 ming dollar va 2,5 million soʻmni olayotgan vaqtida u ashyoviy dalillar bilan qoʻlga olindi.

Erkakka nisbatan jinoyat ishi qoʻzgʻatilib, tergov harakatlari olib borilmoqda.

Bundan tashqari, Toshkentda uch nafar chet el fuqarosiga deyarli 30 ming dollar evaziga Oʻzbekistonga kirish vizalarini noqonuniy rasmiylashtirib berishda gumonlangan ikki ayol qoʻlga olindi. Ulardan biri jami summani olayotgan vaqtida, ikkinchisi esa unga 27 ming dollar topshirilganidan keyin ushlandi; ikkalasiga nisbatan jinoyat ishi qoʻzgʻatilgan.