Toshkentda avtobuslarda chiptasiz yuruvchilarga nisbatan nazorat kuchaytirildi
Yoʻl haqini toʻlashning yangi tartibi joriy etilganidan keyin Toshkentda chiptasiz yurganlik uchun tuzilgan bayonnomalar soni qariyb 68 foizga oshdi.
Toshkentda avtobuslarda yoʻl haqini toʻlamaydigan yoʻlovchilar ustidan nazorat kuchaytirildi
Toshkentda shahar avtobuslarida yoʻl haqini toʻlamaydigan yoʻlovchilar ustidan nazorat kuchaytirildi. Bu haqda Transport vazirligi matbuot xizmati xabar bermoqda.
Idora brutto-kontrakt tizimi boʻyicha ishlaydigan barcha shahar avtobuslarida 2024 yil 1 sentyabrdan boshlab yoʻl haqini toʻlashning yangi tartibi amal qilayotganini eslatib oʻtdi. Endilikda yoʻlovchilar yoʻl haqini avtobusga kirishdayoq toʻlashlari shart.
Toʻlov tartibi oʻzgargani sababli «Toshkent shahar yoʻlovchi tashishni monitoring va nazorat qilish» davlat muassasasi nazoratchilari tomonidan kuchaytirilgan nazorat-reyd tadbirlari oʻtkazilmoqda. Ularning vazifasi — yoʻlovchilar oʻrtasida yoʻl haqini toʻlash intizomi va madaniyatini oshirishdan iborat.
Statistika aniqlangan qoidabuzarliklar soni ortib borayotganidan dalolat beradi. Avgust oyida yoʻl haqini toʻlamagan 10 843 nafar yoʻlovchiga nisbatan Maʼmuriy javobgarlik toʻgʻrisidagi kodeksning chiptasiz yurganlik uchun javobgarlikni nazarda tutuvchi 144-moddasi 5-qismi bilan maʼmuriy bayonnomalar rasmiylashtirilgan.
Avgust oyida kuniga oʻrtacha 350 taga yaqin shunday holat qayd etilgan.
Sentyabr oyining dastlabki sakkiz kunida aniqlangan qoidabuzarliklar soni sezilarli darajada yuqori boʻldi. 8 sentyabr holatiga koʻra, yoʻl haqini toʻlamagan 4 696 nafar yoʻlovchiga nisbatan xuddi shu modda boʻyicha maʼmuriy bayonnomalar tuzilgan.
Ushbu davrdagi oʻrtacha kunlik koʻrsatkich 587 ta bayonnomaga yetdi. Transport vazirligining qayd etishicha, bu koʻrsatkich avgust oyidagi oʻrtacha koʻrsatkichga nisbatan kuniga 237 taga yoki deyarli 68 foizga oshgan.
Shu tariqa, yoʻl haqini toʻlashning yangi tartibi joriy etilganidan soʻng, shahar avtobuslarida talablarga rioya etilishi ustidan nazorat kuchaytirildi, bu esa chiptasiz yurish boʻyicha aniqlangan holatlar sonida oʻz aksini topdi.