Toshkentda avtobus va metro yoʻl haqi narxi oshirilishi mumkin — Transport vazirligi sabablarini tushuntirdi

Toshkentda avtobus va metro yoʻl haqi oshirilishi mumkin — Transport vazirligi sabablarini maʼlum qildi

Xalq deputatlari Toshkent shahar Kengashi jamoat transportida yoʻl haqi tariflarini qayta koʻrib chiqish loyihasini jamoatchilik muhokamasiga qoʻydi. Oʻzbekiston Transport vazirligi ushbu loyiha yuzasidan batafsil tushuntirish berdi.

Hujjatga koʻra, 1 oktyabrdan quyidagi tariflarni belgilash taklif etilmoqda:

elektron toʻlov amalga oshirilganda avtobus yoki metroda bir martalik yoʻl haqi — amaldagi 1700 soʻm oʻrniga 2500 soʻm;

naqd pul bilan toʻlanganda — 3000 soʻm, oʻzgarishsiz qoladi;

bagaj tashish — 4000 soʻm.

Bundan tashqari, loyihada doimiy yoʻlovchilar uchun abonementlar, shuningdek, jamoat transportining bir turidan boshqasiga oʻtish uchun alohida tariflar nazarda tutilgan.

Vazirlik yoʻl haqining har qanday oʻzgarishi aholining kundalik xarajatlariga bevosita taʼsir qilishini taʼkidladi. Shu bois, jamoat transporti faoliyati xarajatlari nimalardan iborat ekanligini va yoʻlovchi ushbu toʻlov evaziga qanday xizmatlarni olishi kerakligini ochiq tushuntirish muhimdir.

Hozirda poytaxt jamoat transporti har kuni 2,5 millionga yaqin yoʻlovchiga xizmat koʻrsatmoqda. Toshkent shahri kengayib, aholi soni ortib borishi bilan muntazam va qulay transport xizmatlariga boʻlgan ehtiyoj ham ortib bormoqda.

Amalga oshirilgan islohotlar natijasida harakatlanuvchi tarkib soni deyarli ikki baravarga koʻpaydi, avtobuslar soni esa 1900 taga yaqinlashdi. Harakatlanishning oʻrtacha intervali 30 daqiqadan 15 daqiqagacha qisqardi. Yoʻnalishlar tarmogʻi ham yangi turar joy mavzelari va poytaxtga tutash hududlar hisobiga kengaymoqda.

«Biroq harakatlanuvchi tarkibni sotib olishning oʻzi kifoya emas. Uning har kuni yoʻnalishlarga chiqishini va texnik sozligini taʼminlash zarur. Xarajatlar tarkibiga mashinistlar, haydovchilar va texnik xodimlarning ish haqi, yoqilgʻi va elektr energiyasi, ehtiyot qismlar va shinalar, harakatlanuvchi tarkibga texnik xizmat koʻrsatish va taʼmirlash, depo va quvvatlash infratuzilmasini saqlash, salonlarni tozalash, shuningdek, dispetcherlik, navigatsiya va elektron toʻlov tizimlari faoliyati kiradi», — deyiladi idora tushuntirishida.

Vazirlik maʼlumotlariga koʻra, amaldagi tarif ushbu xarajatlarning faqat bir qismini qoplaydi. Tashishlarni moliyalashtirish boʻyicha asosiy yuklama hamon davlat byudjeti zimmasiga tushmoqda.

Idorada taʼkidlanishicha, tarifning ehtimoliy oʻzgarishi tashuvchilarga qoʻyiladigan aniq talablar bilan bir vaqtda koʻrib chiqilishi kerak. Gap qatnovlarning muntazamligi, belgilangan harakat intervallariga rioya qilinishi, transport vositalarining texnik holati va tozaligi, yoʻlovchilar xavfsizligi, xizmat koʻrsatish madaniyati va yoʻnalishlar tarmogʻini yanada kengaytirish haqida bormoqda.

Fuqarolar tariflarni oʻzgartirish toʻgʻrisidagi hujjat loyihasi bilan 19 sentyabrga qadar tanishishlari hamda oʻz taklif va mulohazalarini yuborishlari mumkin. Kelib tushgan barcha murojaatlar yakuniy qaror qabul qilishda koʻrib chiqiladi.