Toshkent Oxford Economics nashrining Global Cities Index 2026 reytingida 128 pogʻonaga koʻtarildi

**Toshkent Oxford Economics tashkilotining Global Cities Index 2026 reytingida 128 pogʻonaga koʻtarildi**

Toshkent Oxford Economics tadqiqot kompaniyasi tomonidan eʼlon qilingan Global Cities Index 2026 reytingida dunyodagi 1000 ta yirik shahar orasida 343-oʻrinni egalladi. Oʻtgan yil davomida Oʻzbekiston poytaxti 128 pogʻonaga yuqoriladi.

Oxford Economics, shuningdek, Toshkentni **«Eʼtibor qaratish lozim boʻlgan 28 ta shahar»** (28 Cities to Watch) roʻyxatiga kiritdi — bu kuchli rivojlanish surʼatiga va yaqin yillarda sezilarli yutuqlarga erishish salohiyatiga ega deb koʻrilayotgan shaharlar guruhidir.

«**Toshkent Markaziy Osiyoning eng istiqbolli shahar iqtisodiy markazlaridan biri sifatida namoyon boʻlmoqda,**» deyiladi hisobotda. Sovet Ittifoqi parchalanishidan oldin Toshkent yirik sanoat markazi boʻlgan; mustaqillikka erishilgach va xalqaro bozorlarga ochilingach, shahar iqtisodiyoti ancha diversifikatsiyalashdi. Bugungi kunda, hisobotga koʻra, Oʻzbekiston poytaxti qurilish bumi va iqtisodiyotning bir nechta tarmoqlariga investitsiyalar oqimi ortishi fonida barqaror oʻsishni namoyish etmoqda. Sharqiy Yevropa va Markaziy Osiyodagi koʻplab shaharlardan farqli oʻlaroq, bu yerda aholining barqaror oʻsishi ham davom etmoqda.

Indeksda Toshkentning geografik joylashuvi va malakali ishchi kuchi asosiy kuchli tomonlar sifatida koʻrsatilgan. Shu bilan birga, Oxford Economics shaharda aholi jon boshiga yalpi ichki mahsulotning (YAIM) pastligi boyroq mamlakatlarga «aqllar oqimi» xavfini oshirishidan ogohlantiradi. Hisobotda, shuningdek, ekologik bosim — ayniqsa suv taqchilligi — zudlik bilan eʼtibor qaratishni talab qiladigan dolzarb muammo sifatida koʻrsatilgan.

## Toshkentning koʻrsatkichlari

Indeks beshta toifa — iqtisodiyot, inson kapitali, hayot sifati, atrof-muhit va boshqaruv asosida tuzilgan boʻlib, ularning har biri umumiy reytingga birlashtirilishidan oldin 0 dan 100 gacha boʻlgan shkala boʻyicha baholanadi.

**Iqtisodiyot** (Economics) yoʻnalishida Toshkent 54,7 ball olib, global miqyosda 188-oʻrinni egalladi va eng yaxshi 20% lik roʻyxatdan joy oldi. Bu toifa shahar iqtisodiyotining hajmi, tuzilmasi va oʻsish surʼatlarini ham oʻtmishdagi koʻrsatkichlar, ham kelajakdagi istiqbollar asosida baholaydi.

**Inson kapitali** (Human Capital) yoʻnalishida Toshkent 61,5 ball toʻplab, dunyo boʻyicha 108-oʻrinni egalladi va bu borada ham eng yaxshi 20% lik roʻyxatga kirdi. Ushbu koʻrsatkich shahardagi isteʼdodlar bazasining hajmi va sifatini, shuningdek, malakali mutaxassislarni jalb qilish, rivojlantirish va saqlab qolish qobiliyatini baholaydi.

**Hayot sifati** (Quality of Life) yoʻnalishida Toshkent 47,5 ball olib, global miqyosda 644-oʻrinni egalladi — bu roʻyxatning quyi 40% lik qismiga toʻgʻri keladi. Bu toifa aholining farovonligi va mamnuniyat darajasini, shuningdek, uy xoʻjaliklari moliyasi, sogʻliqni saqlash natijalari va shahar infratuzilmasidan foydalanish imkoniyatlari kabi yashash sharoitlarini koʻrib chiqadi.

**Atrof-muhit** (Environment) yoʻnalishida Toshkent 45,1 ball toʻplab, dunyo boʻyicha 806-oʻrinni egalladi va quyi 15% lik roʻyxatdan joy oldi. Bu koʻrsatkich shaharning rivojlanish va atrof-muhitni muhofaza qilish oʻrtasidagi muvozanatni qanchalik yaxshi taʼminlayotganini, shuningdek, uning ekologik xavf-xatarlarga taʼsirchanligini aks ettiradi.

Toshkent eng past natijani **Boshqaruv** (Governance) yoʻnalishida qayd etdi — 40,2 ball bilan global miqyosda 825-oʻrinni egalladi va bu ham quyi 15% lik roʻyxatga toʻgʻri keladi. Bu toifa shahar institutlarining kuchini, tartibga solish muhitining sifatini hamda aholi va biznes uchun sharoitlarning barqarorligini baholaydi. «**Samarali boshqaruv shaharning rejalashtirish, investitsiya kiritish hamda aholi va biznes ehtiyojlarini qondirish qobiliyatining asosidir,**» deb taʼkidlaydi hisobot mualliflari.

## Top-10 shahar

Reytingning yuqori pogʻonalarini AQSh, Yevropa va Osiyo shaharlari egallagan. Nyu-York mukammal 100 ball bilan birinchi oʻrinni egalladi, undan keyingi oʻrinda 98,8 ball bilan London bordi; har ikki shahar oʻz iqtisodiyoti va inson kapitali koʻlami boʻyicha ayniqsa yuqori ball toʻpladi. Parij 93,4 ball bilan uchinchi oʻrinni egalladi.

Top-10likning qolgan qismini Sietl, San-Frantsisko, Dublin, Boston, San-Xose, Tokio va Tsyurix tashkil etdi.

Markaziy Osiyo shaharlari orasida Olmaota 265-oʻrinni, Astana 281-oʻrinni egallagan boʻlsa, Bishkek 461-oʻrinni, Ashxobod 668-oʻrinni va Dushanbe 672-oʻrinni band etdi.