Toshkent: ijobiy va salbiy tomonlari
Markaziy Osiyoda yashash va biznes yuritish uchun eng yaxshi joy qayerda — Global Cities Index 2026
Toshkent: kuchli va zaif tomonlari
Oʻzbekiston poytaxti Global Cities Index 2026 umumiy reytingida dunyoning 1 mingta eng yirik shaharlari orasida 343-oʻrinni egalladi. Shu bilan birga, iqtisodiyot boʻyicha Toshkent Olmaota va Ostonadan yuqoriroq boʻldi, inson kapitali boʻyicha esa global roʻyxatdagi eng yaxshi shaharlarning taxminan 11 foizi qatoriga kirdi.
Umumiy hisobda Toshkent oʻtgan yilga nisbatan oʻz natijasini 128 pogʻonaga yaxshilab, 343-oʻrindan joy oldi.
Iqtisodiyot — 188-oʻrin
Inson kapitali — 108-oʻrin
Hayot sifati — 644-oʻrin
Atrof-muhit — 806-oʻrin
Boshqaruv — 825-oʻrin
Umumiy reytingda Toshkent mintaqaviy roʻyxatda yetakchi oʻrinlarni egallab turgan Ostona va Olmaotadan orqada qolmoqda, biroq iqtisodiyot boʻyicha har ikki shahardan ustundir. Aynan shu toifada Oʻzbekiston poytaxti eng sezilarli oʻsishni koʻrsatdi — 558-oʻrindan 188-oʻringa koʻtarildi.
Oxford Economics prognoziga koʻra, 2026–2030 yillarda Toshkent yalpi hududiy mahsuloti (YAHM) yiliga oʻrtacha 7 foizdan koʻproqqa oshadi — bu Markaziy Osiyo va Sharqiy Yevropa shaharlari iqtisodiyoti orasida eng yuqori koʻrsatkichdir.
Umumiy reytingda Toshkent Moskvadan 30 pogʻona orqada, ammo iqtisodiyot boʻyicha Rossiya poytaxtidan yuqoriroq oʻrinda joylashgan — 205-oʻringa qarshi 188-oʻrin.
Oʻzbekiston poytaxti — Oxford Economics tomonidan Cities to Watch roʻyxatiga kiritilgan Markaziy Osiyodagi yagona shahardir. Unga har bir mintaqadan sezilarli dinamika koʻrsatayotgan va tahlilchilarning fikriga koʻra, yaqin yillarda reytingdagi oʻz mavqeini yaxshilashga qodir boʻlgan beshtadan shahar kiritilgan.
Oxford Economics Toshkentning kadrlar salohiyatini alohida qayd etadi: inson kapitali boʻyicha poytaxt dunyoda 108-oʻrinni, Markaziy va Sharqiy Yevropa hamda Markaziy Osiyo mintaqasida esa oltinchi oʻrinni egalladi. Malakali mutaxassislar sonining ortishi shaharni biznes uchun yanada jozibador qiladi.
Toshkent, shuningdek, texnologiya va moliya sohasida mintaqaviy markaz maqomini mustahkamlamoqda. Tahlilchilar Tashkent IT Park va xalqaro moliya markazini tashkil etishni nazarda tutuvchi «Oʻzbekiston — 2030» strategiyasini asosiy loyihalar qatorida tilga oladilar. Transformatsiyaning yana bir omili qurilish, jumladan, Yangi Toshkent loyihasidir.
Shaharning Rossiyani chetlab oʻtib, Yevropa va Osiyoni bogʻlaydigan Oʻrta yoʻlakda joylashgani ham uning mintaqaviy logistika markazi sifatidagi rolini oshiradi. Oxford Economics Ukrainada urush boshlanganidan keyin Rossiya biznesi va kapitalining bir qismi yanada neytral yoʻnalishlarni izlay boshlaganini koʻrsatadi.
Xavf-xatarlar qatorida Oxford Economics aholi jon boshiga toʻgʻri keladigan nisbatan past YAIMni ajratib koʻrsatadi: bu quvib yetish oʻsishi uchun salohiyat yaratadi, lekin ayni paytda malakali mutaxassislarning boyroq mamlakatlarga chiqib ketish xavfini oshiradi.
Ekologik xavflar ham keyingi rivojlanishni cheklashi mumkin. Tahlilchilar chiqindilarning yuqori intensivligi, harorat anomaliyalari va Oʻzbekistonning tashqi suv manbalariga qaramligiga eʼtibor qaratmoqdalar. Atrof-muhit toifasida Toshkent 806-oʻrinni egalladi.