Toshkent metrosida tigʻiz vaqtlarda poyezdlar harakati oraligʻi qisqartirildi. Video

Toshkent metrosida tigʻiz vaqtlarda poyezdlar harakati oraligʻi qisqartirildi. Video

Yangi oʻquv yili boshlanishi bilan Toshkent metropolitenida tigʻiz vaqtlarda ish kuchaytirildi. Barcha yoʻnalishlarda poyezdlar orasidagi vaqt oraligʻi qisqartirildi, stantsiyalarda esa xodimlarning qoʻshimcha navbatchiligi joriy etildi.

Intervallarning qisqartirilishi ertalabki va kechki soatlarda yoʻlovchilar oqimining kutilayotgan oʻsishi bilan bogʻliq. Endi Chilonzor yoʻnalishida poyezdlar 1,5–2 daqiqalik, Oʻzbekiston yoʻnalishida — uch daqiqagacha, Yunusobod yoʻnalishida — toʻrt daqiqagacha, yer usti halqa yoʻnalishida esa 7–8 daqiqalik oraliq bilan harakatlanmoqda.

Stantsiyalarda ham qoʻshimcha choralar koʻrildi. Tigʻiz vaqtlarda barcha 50 ta stantsiyada metropoliten rahbarlari va masʼul xodimlari navbatchilik qilmoqda. Ular yoʻlovchilar oqimini nazorat qiladi, yoʻlovchilarga yordam beradi va zarurat tugʻilganda yuzaga kelgan vaziyatlarga tezkorlik bilan munosabat bildiradi.

Yuklama ortishi kutilayotgan «Chilonzor», «Paxtakor», «Amir Temur xiyoboni», «Alisher Navoiy» va «Beruniy» stantsiyalariga alohida eʼtibor qaratilmoqda.

Metropolitenda harakat jadvali yoʻlovchilar oqimini hisobga olgan holda tuzatib borilishi taʼkidlandi.

Bundan tashqari, 7 sentyabrdan boshlab Toshkentda talabalarga qulaylik yaratish maqsadida «Mirzo Ulugʻbek metro bekati – OʻzDJTU» vaqtinchalik avtobus yoʻnalishi ish boshladi.