Toshkent metrosida kunning tigʻiz vaqtlarida poyezdlar harakati intervallari qisqartiriladi
Poyezdlar harakati intervallari Chilonzor yoʻnalishida 1,5–2 daqiqagacha, Oʻzbekiston yoʻnalishida 3 daqiqagacha, Yunusobod yoʻnalishida 4 daqiqagacha va yerusti halqa yoʻli yoʻnalishida 7–8 daqiqagacha qisqartiriladi.
Toshkent metropoliteni yangi oʻquv yili boshlanishi munosabati bilan yoʻlovchilar sonining koʻpayishiga tayyorgarlik koʻrmoqda. Bu haqda metropolitenning rasmiy kanali maʼlum qildi. Maqsad – yoʻlovchilarga qulay, xavfsiz va sifatli xizmat koʻrsatish.
Xabarga koʻra, kunning eng gavjum vaqtlarida barcha yoʻnalishlarda poyezdlar harakati oraligʻi qisqartiriladi:
* Chilonzor yoʻnalishida 1,5–2 daqiqagacha;
* Oʻzbekiston yoʻnalishida 3 daqiqagacha;
* Yunusobod yoʻnalishida 4 daqiqagacha;
* Yerusti halqa yoʻli yoʻnalishida 7–8 daqiqagacha.
Bundan tashqari, 2026-yilgacha metropoliten vagon parkini 14 ta yangi, zamonaviy poyezd bilan toʻldirish rejalashtirilgan. Hozirga qadar ularning 11 tasi yetkazib berilgan, yaqin kunlarda yana 3 ta poyezd olib kelinishi kutilmoqda.
Yoʻlovchilarga xizmat koʻrsatish sifatini oshirish, bekatlarda xavfsizlikni taʼminlash va yoʻlovchilar oqimini samarali boshqarish maqsadida kunning tigʻiz vaqtlarida barcha 50 ta metro bekatida navbatchilik tizimi joriy etilgan.