Toshkent Kengashi YHXBga YTHlardagi oʻlim holatlarini kamaytirish rejasini qabul qilishni yana bir bor topshirdi

Toshkent Kengashi YHXBga YTHlardagi oʻlim holatlarini kamaytirish boʻyicha reja tayyorlashni yana bir bor topshirdi

Toshkent shahar IIBB YHXBning yangi rahbari etib podpolkovnik Ilhom Idirov tayinlandi.

Bungacha u Oʻzbekiston IIV YHXX Maʼmuriy amaliyot boʻlimi boshligʻi lavozimida ishlagan, shuningdek, Qashqadaryo va Sirdaryo viloyatlari yoʻl harakati xavfsizligi boshqarmalarini boshqargan. U ushbu lavozimda IIV Akademiyasi magistraturasiga oʻqishga kirgan (bu ichki ishlar organlari rahbarlik tarkibidagi lavozimlarga tayinlanish uchun talab hisoblanadi) Muhammad Adilovning oʻrnini egalladi.

Shu hafta xalq deputatlari Toshkent shahar Kengashida YHXBning hisoboti eshitildi, uni YHXB boshligʻi oʻrinbosari Elmurod Alimov taqdim etdi. Kengash boshqarmaning qonunchilik bilan zimmasiga yuklatilgan vazifalarni bajarish boʻyicha faoliyatini qoniqarli deb baholab, yoʻl harakati xavfsizligi sohasida «vaziyat barqarorlashganini» qayd etdi.

Deputatlarga bir hafta muddatda boshqarma uchun oʻlim bilan bogʻliq yoʻl-transport hodisalarining oldini olish boʻyicha «aniq va manzilli chora-tadbirlar» rejasini ishlab chiqish topshirildi. Bunda jarohatlanish va oʻlim holatlarini kamaytirish boʻyicha aniq maqsadli koʻrsatkichlar keltirilmagan. Kengash xuddi shunday topshiriqni 2025 yil boshida ham bergan edi.

Bundan tashqari, Toshkent shahar Transport va yoʻl-transport infratuzilmasini rivojlantirish bosh boshqarmasi bilan birgalikda infratuzilmani kompleks yaxshilash, harakatni boshqarish tizimini raqamlashtirish, jumladan, YTH oʻchoqlari tahlili asosida kameralar oʻrnatish, shuningdek, avtobuslarni boshqa transport vositalari haydovchilari tomonidan YHQ buzilishini qayd etuvchi registratorlar bilan jihozlash ishlarini tezlashtirish topshirildi.

Kengashning eʼlon qilingan qarorida yarim yillikdagi YTHlarda jarohatlanish va oʻlim holatlari boʻyicha raqamlar koʻrsatilmagan, biroq «Gazeta» ushbu maʼlumotlar bilan tanishishga muvaffaq boʻldi.

Rasmiy roʻyxatga olingan YTHlarning umumiy soni 9,5 foizga yoki 44 taga kamayib, 464 tadan 420 taga tushgan.

Jarohatlanish holatlari soni 10 foizga yoki 44 taga kamayib, 438 tadan 394 taga yetgan. Bunda YTH oqibatidagi oʻlim holatlari soni 26 ta darajasida oʻzgarishsiz qolgan.

Oʻtgan yil yakunlari boʻyicha kengash bunday holatlar boʻyicha statistikani eʼlon qilgan edi. Bir yil davomida jami 1225 ta YTH qayd etilgan (4,3% ga kamayish), tan jarohati olish holatlari 1135 tani (minus 4,5%), oʻlim holatlari esa 90 tani (1,1% ga yoki 1 ta holatga kam) tashkil etgan.

Olti oy davomida foto va videofiksatsiya tizimlari, shuningdek, YPX inspektorlari tomonidan Toshkentda 3 011 466 ta YHQ buzilishi holati qayd etilgan.

Shundan 2 307 865 ta qoidabuzarlik avtomatlashtirilgan tizimlar tomonidan qayd etilgan. YPX xodimlari 703 601 ta qoidabuzarlikni rasmiylashtirgan, jumladan, 21 208 ta qoʻpol qoidabuzarlik, ulardan 2047 tasi avtomobilni mast holatda boshqarish holatidir. Bundan tashqari, 165 390 nafar piyodaga nisbatan bayonnomalar tuzilgan. Jami 43 769 ta transport vositasi jarima maydonchalariga joylashtirilgan.

YHXBda YTHlarning ayrim turlari sezilarli darajada kamaygani qayd etilib, bu infratuzilmani yaxshilash va raqamlashtirish chora-tadbirlari bilan bogʻlangan.

Xususan, tezlikni oshirish bilan bogʻliq YTHlar soni 47,8 foizga — 23 tadan 12 taga kamaygan. Bunda Yakkasaroy va Olmazor tumanlarida bunday YTHlar qayd etilmagan.

Qarama-qarshi harakatlanish boʻlagiga chiqib, quvib oʻtish qoidalarini buzish bilan bogʻliq YTHlar soni 55,2 foizga kamayib, 29 tadan 13 taga tushgan.

Svetofor ishoralariga amal qilmaslik oqibatida yuz bergan YTHlar soni 50 foizga — 24 tadan 12 taga, mast holatda transport boshqarish holatlari ham xuddi shunchaga — 6 tadan 3 taga kamaygan.

Shu bilan birga, «Oʻzbekiston-2030» Strategiyasida yoʻllarda halok boʻlganlar sonini kamaytirishga qaratilgan maqsad juda mavhum ifodalangan, vaholanki bu mamlakatdagi eng oʻtkir ijtimoiy ahamiyatga molik muammolardan biridir.

Davlat siyosatining haqiqiy maqsadi yoʻllarda odamlar oʻlimiga nisbatan murosasizlik (nol darajali bagʻrikenglik) boʻlishi kerak, deb taʼkidlagan barqaror harakatchanlik va infratuzilma siyosati boʻyicha ekspert Bobur Sirojev:

«Nol. Biz qabul qilishimiz kerak boʻlgan yagona raqam».

U, shuningdek, statistikaning yopiqligi va foydalanish imkoniyati yoʻqligi yoʻl harakati xavfsizligi sohasidagi haqiqiy manzarani koʻrishga xalaqit berishini taʼkidlagan.

Umumlashtirilgan koʻrsatkichlar sabab va oqibatlarni toʻlaqonli tahlil qilish imkonini bermaydi. Natijada qarorlar koʻr-koʻrona qabul qilinishi mumkin (koʻchalar oʻrtasiga panjaralarni qaytarishga boʻlgan urinishni eslash kifoya, shahar OAVdagi tanqidlardan soʻng buni toʻxtatgan edi).

Oʻzbekistonda allaqachon «koʻrlik» yoki qonunni tanlab qoʻllash holati shakllanib boʻlgan.

Kundalik ommaviy YHQ buzilishlari tobora «koʻr nuqtalar»ga tushib qolmoqda va muammo sifatida qabul qilinmay qoʻymoqda: tartibga soluvchining ishoralarini mensimaslik, manevr qilish qoidalarini buzish, ongli ravishda xavfli haydash, avtobus yoʻlaklarida yurish, qizil chiroqdan «oʻtib ketish», tartibsiz toʻxtab turish, avariyaviy toʻxtash ishorasini suiisteʼmol qilish va boshqalar.

Koʻchalar va yoʻllarning dizayni, shuningdek, toʻgʻri loyihalashtirilgan infratuzilma mavjudligi — chorrahalar va piyodalar oʻtish joylarida svetoforlar va belgilarning yetishmasligi, koʻchalar va boʻlaklarning kengligi, burilish radiuslarining notoʻgʻriligi, «koʻrinish uchburchaklari»ning yoʻqligi, chiziqlar, belgilar va svetoforlar oʻrtasidagi ziddiyatlar va hokazolar boʻyicha ham koʻplab savollar mavjud.

Natijada, YHQ buzilishi boʻyicha rasman eʼlon qilinadigan statistikani borligicha qabul qilib boʻlmaydi.

«Agar profilaktikaga mavjud yondashuvlarni qayta koʻrib chiqmasak, mavsumiy „oyliklar“dan tizimli chora-tadbirlarga oʻtmasak, yaqin kelajakda ortga qaytmas nuqtaga kelib qolish xavfimiz bor», — deb taʼkidlagan Bobur Sirojev.