Toshkent dorixonalarida dori-darmon narxlari bir necha barobar oshirib yuborilgani aniqlandi

Toshkent dorixonalarida dori-darmonlar narxi bir necha barobar oshirib sotilgani aniqlandi

Toshkentdagi bir qator dorixonalarda preparatlar belgilangan cheklangan qiymatlardan bir necha barobar yuqori narxlarda sotilgan. Qonunbuzarliklar Raqobat qoʻmitasi mutaxassislari tomonidan «sirli xaridor» usulidagi tekshiruvlar davomida aniqlandi.

Xususan, Shunqorlar dorixonasida «Polimik» preparati 12,8 ming soʻm oʻrniga 70 ming soʻmdan, «Konvuleks» esa 66,4 ming soʻmlik meʼyor oʻrniga 395 ming soʻmdan sotilgan. Muno Farm dorixonasida «Stimuloton» tabletkalari ruxsat etilgan 50,6 ming soʻm oʻrniga 295 ming soʻm turgan.

Amir Farm Trade dorixonasida «Baktamed» 18,8 ming soʻm oʻrniga 32 ming soʻmdan taklif qilingan boʻlsa, City Farm tarmogʻida xuddi shu preparat 63 ming soʻmdan — 3,3 barobar qimmatroq sotilgan. Hosil Farm dorixonasida «Lantus» 115 ming soʻmlik meʼyor oʻrniga 190 ming soʻm, «Slideron» esa 115,6 ming soʻm oʻrniga 349 ming soʻm — taxminan uch barobar qimmatroq turgan.

Tekshiruv yakunlariga koʻra, qoʻmita koʻrsatmalar berdi va litsenziyalarni qayta koʻrib chiqish uchun materiallarni vakolatli organlarga yubordi. Idorada tekshiruvlar davom etishi, «sirli xaridor» usuli esa narxlarni nazorat qilishning muntazam vositasiga aylanishi taʼkidlandi.

Bundan avval narxlarni oshirib yuborganlik uchun 2,5 mingdan ortiq dorixona jazolangan, isteʼmolchilarga 21 milliard soʻmdan ortiq mablagʻ qaytarilgan edi.