To‘qqiz oyda xorijda qiyin ahvolda qolgan 5 mingga yaqin o‘zbekistonlik vatanga qaytarildi
2026-yilning yanvar—sentyabr oylarida Migratsiya agentligi tomonidan xorijda og‘ir holatga tushgan fuqarolarni qo‘llab-quvvatlash hamda ularni O‘zbekistonga olib kelish uchun 22,4 mlrd so‘m ajratildi.
To‘qqiz oy ichida xorijda og‘ir ahvolga tushib qolgan qariyb 5 ming nafar o‘zbekistonlik vatanga olib kelindi
2026-yilning 9 oyida xorijda qiyin vaziyatga tushgan O‘zbekiston fuqarolarini qo‘llab-quvvatlash uchun 22,4 mlrd so‘m ajratildi. Bu haqda Migratsiya agentligi xabar berdi.
Mazkur mablag‘lar hisobidan quyidagi amaliy yordamlar ko‘rsatildi:
4 968 nafar fuqaro vatanga qaytarildi — 20 mlrd 396 mln so‘m;
1 171 nafar fuqaroga bir martalik moddiy yordam berildi — 1 mlrd 563 mln so‘m;
167 nafar fuqaro vaqtincha yashash joyi (xostel/boshpana) bilan ta’minlandi — 249 mln so‘m;
38 nafar fuqaroning tibbiy xizmat xarajatlari qoplab berildi — 228,6 mln so‘m.
850 ming dollar undirildi
Ma’lumot uchun, to‘qqiz oy davomida 817 nafar fuqaro maosh va kompensatsiyalarni olishda muammoga duch kelib Agentlikka murojaat qilgan va o‘zbekistonliklar foydasiga jami 850 ming AQSH dollari undirib berilgan.
Bu holatlarning asosiy qismi, ya’ni 533 tasi Rossiya Federatsiyasiga, 155 tasi Turkiyaga, 92 tasi Janubiy Koreyaga hamda 37 tasi boshqa davlatlarga to‘g‘ri keladi.
2026-yilning yanvar—iyun oylarida chet eldan O‘zbekistonga yuborilgan pul o‘tkazmalari hajmi 13 foizga oshib, 9,3 milliard dollarga yetgan edi. Pul o‘tkazmalarining ko‘payishiga chet elda ishlayotgan fuqarolarning oylik maoshlari barqaror saqlanib qolgani, ayrim davlatlar valyutasining qadri oshgani hamda o‘zbekistonliklarning Yevropa va Osiyoning yangi mamlakatlariga ishlash uchun ko‘proq borayotgani sabab bo‘lgan.