Tojikiston Xalqaro jinoiy suddagi ishtirokini toʻxtatishi mumkin
Tojikiston Xalqaro jinoiy suddagi ishtirokini toʻxtatishi mumkin
Tojikiston Xalqaro jinoiy sud Statutining mamlakat uchun amal qilishini toʻxtatish imkoniyatini oʻrganmoqda.
Tegishli qaror loyihasi 16 sentyabr kuni boʻlib oʻtgan navbatdan tashqari yigʻilishda respublika parlamenti quyi palatasi Kengashi tomonidan koʻrib chiqildi.
«Xalqaro jinoiy sud Statutining amal qilishini toʻxtatish toʻgʻrisida»gi loyiha muhokamasi yakunlariga koʻra tegishli qarorlar qabul qilindi, biroq parlament aynan nimaga qaror qilingani va bu Tojikistonning shartnomadan chiqishi toʻgʻrisidagi yakuniy qarorni anglatadimi-yoʻqmi, bunga aniqlik kiritmadi.
Tojikiston Xalqaro jinoiy sudni taʼsis etgan Rim statutini 1998 yil 30 noyabrda imzolagan va 2000 yil 5 mayda ratifikatsiya qilgan. Mamlakat uchun hujjat 2002 yil 1 iyulda kuchga kirgan.
XJS eng ogʻir xalqaro jinoyatlar, jumladan, genotsid, insoniyatga qarshi jinoyatlar va harbiy jinoyatlarga oid ishlarni koʻrib chiqadi. Rim statuti ishtirokchi davlatning undan chiqish imkoniyatini nazarda tutadi: buning uchun BMT Bosh kotibiga yozma bildirishnoma yuboriladi, statutning mamlakat uchun amal qilishi esa, agar davlat kechiroq muddatni koʻrsatmasa, shunday bildirishnoma olinganidan bir yil oʻtib toʻxtatiladi.
Shu bilan birga, loyihaning parlament tomonidan koʻrib chiqilishi faktining oʻzi Tojikiston XJSdan chiqib boʻlganini anglatmaydi. Tojikiston tomoni keyingi qadamlar va statut amal qilishini toʻxtatish muddatlari haqida hozircha maʼlum qilmadi.