Tojikiston poytaxtida 30 ming tomoshabinga moʻljallangan yangi stadion ochildi
Arena FIFA standartlari asosida qurilgan boʻlib, xalqaro oʻyinlar va yirik sport musobaqalarini qabul qiladi.
Dushanbeda 30 ming tomoshabinga moʻljallangan yangi stadion ochildi
21-avgust kuni Tojikiston poytaxti Dushanbe shahrida yangi Milliy stadion ishga tushirildi. Ochilish marosimida Tojikiston prezidenti Imomali Rahmon va Dushanbe shahri raisi Rustami Imomali ishtirok etishdi.
Sport majmuasi 9,5 gektar maydonni egallaydi va 30 mingdan ortiq tomoshabinni sigʻdira oladi. Ikki yarusli tribunalar pastki qavatda 12 mingdan ortiq, yuqori qavatda esa 18 ming kishini joylashtirish imkoniyatiga ega.
Milliy stadion FIFAning xalqaro talablariga muvofiq qurilgan boʻlib, ikkinchi xalqaro toifaga kiradi. Bu yerda yuqori darajadagi klub oʻyinlari va xalqaro musobaqalarni oʻtkazish mumkin. Stadion besh qavat va yertoʻladan iborat boʻlib, balandligi 33 metrga yetadi.
Arena markazida 105x68 metr oʻlchamdagi futbol maydoni joylashgan, bu xalqaro oʻyinlarni oʻtkazish boʻyicha FIFA talablariga javob beradi. Maydon atrofida 130x87 metr oʻlchamdagi sport zonasi mavjud.
Tomoshabinlar uchun 68 ta elektron turniket oʻrnatilgan, stadion hududi esa toʻrtta asosiy sektorga boʻlingan. Bu tartib muxlislarning xavfsiz oʻtishini taʼminlashi, odamlar toʻplanishining oldini olishi va evakuatsiyani tezlashtirishi lozim.
Oʻyinlarni har birining maydoni 133 kvadrat metr boʻlgan ikkita katta LED ekranda tomosha qilish mumkin boʻladi. Obʼyekt xavfsizligini 50 ta videokuzatuv kamerasi va 10 ta oddiy kamera nazorat qilib turadi. Yongʻinga qarshi himoya tizimi 1000 dan ortiq intellektual yongʻin signalizatsiyasidan iborat.
Jamoalar uchun 104 oʻrinli toʻrtta kiyinish xonasi koʻzda tutilgan. Rasmiy va faxriy mehmonlar uchun umumiy sigʻimi 750 kishidan ortiq boʻlgan VIP zallari jihozlangan.
Stadion fasadi alyuminiy panellardan ishlangan. Tungi vaqtda undan katta mediaproyeksiya ekrani sifatida foydalanish mumkin: proyeksiya tizimining maydoni 30 ming kvadrat metrdan oshadi.
Stadion yonida 750 dan ortiq avtomobilga moʻljallangan avtoturargoh tashkil etilgan. Obodonlashtirilgan hudud 3 ming kvadrat metrdan ortiq maydonni egallaydi.
Imomali Rahmon Tojikiston davlat mustaqilligining 35 yilligiga bagʻishlab Milliy stadionning ochilishini mamlakat uchun munosib sovgʻa deb atadi.
Yangi stadion faqat futbol oʻyinlari uchun moʻljallanmagan. Uning maydonida xalqaro musobaqalar, keng koʻlamli marosimlar, shoular va boshqa madaniy-koʻngilochar tadbirlarni oʻtkazish rejalashtirilgan.