Todd Boeli va Mark Uolter “Chelsi”dagi ulushini sotmoqchi — Financial Times

Todd Boeli va Mark Uolter "Chelsi"dagi o'z ulushlarini sotish niyatida — Financial Times xabariga ko'ra.

"Chelsi" direktorlar kengashi raisi Todd Boeli va milliarder Mark Uolter klubning asosiy egasi bo'lgan "Clearlake Capital" kompaniyasiga o'zlariga tegishli 12,8 foizlik aksiyalarni sotish bo'yicha muzokaralar olib borgan. Bu haqda Financial Times nashri ma'lum qildi.

Hozirda "Chelsi" aksiyalarining 61,5 foizi "Clearlake Capital"ga tegishli. Qolgan 38,5 foiz ulush esa Uolter, Boeli va shveysariyalik tadbirkor Xansyorg Viss o'rtasida taqsimlangan. Ushbu konsorsium London klubini 2022-yilda 2,5 milliard funt sterlingga sotib olgan va jamoaga qo'shimcha 1,75 milliard funt sarmoya kiritgan edi. Agar ushbu oldi-sotdi kelishuvi amalga oshsa, klubning umumiy qiymati 5 milliard funtdan (6,8 milliard dollar) oshiqroqqa baholanadi.

Nashrning ta'kidlashicha, 2022-yildagi xarid shartnomasida dastlabki 10 yil davomida aksiyalarni uchinchi shaxslarga sotishni taqiqlovchi band mavjud. Shu sababli, Boeli va Uolterning ulushini faqat "Clearlake Capital" yoki Viss sotib olishi mumkin.

Biroz avvalroq Mark Uolter AQSH prokuraturasi tomonidan ehtimoliy moliyaviy firibgarliklar bo'yicha o'tkazilayotgan tergov fonida NBA'ning "Los-Anjeles Leykers" klubini 12 milliard dollardan ziyod mablag'ga sotib yuborgan edi.

Ma'lumot uchun, "Chelsi" 2003-yildan 2022-yilgacha rossiyalik milliarder Roman Abramovichga tegishli bo'lgan. 2022-yilning mart oyida Buyuk Britaniya unga qarshi sanksiyalar kiritgach, u klubdan voz kechishga majbur bo'lgan.