Qozog‘istonlik futbolchi "Chelsi" safidagi ilk o‘yinida gol kiritdi

Qozog‘istonlik futbolchi Dastan Satpayev "Chelsi" libosida debyut golini kiritdi.

Qozog‘iston terma jamoasi hujumchisi Dastan Satpayev "Chelsi" safidagi ilk o‘yinida gol urishga muvaffaq bo‘ldi. 17 yoshli futbolchi Avstraliyaning "Vest Sidney" jamoasiga qarshi o‘rtoqlik uchrashuvining oltinchi daqiqasida hisobni ochdi.

U maydon markazida to‘pni egallab, raqib himoyachisidan o‘tib ketdi va jarima maydonchasi ichiga kirib, o‘ng oyoqda kuchli zarba bilan darvozani ishg‘ol qildi.

"Chelsi" Satpayevni 2025-yil yanvar oyida "Qayrat" klubidan 4,3 million yevroga sotib olgan edi. Avgust oyida 18 yoshga to‘ladigan hujumchi uchun bu London klubi safidagi ilk uchrashuv bo‘ldi.