"Toʻrtda uygʻonish kerak". Mirziyoyev Koreyadagi ish grafigi haqida gapirib berdi. Video
«Toʻrtda uygʻonish kerak». Mirziyoyev Koreyadagi ish grafigi haqida gapirib berdi. Video
Janubiy Koreyaga davlat tashrifi doirasida Oʻzbekiston prezidenti Shavkat Mirziyoyev vatandoshlar bilan uchrashdi. Muloqot toʻqqiz soatga yaqin davom etdi. Dastur juda tigʻiz boʻlgani va jamoasining tadbirni bekor qilish haqidagi takliflariga qaramay, davlat rahbari uni oʻtkazishni talab qildi va oʻz ish tartibi haqida gapirib berdi: uning soʻzlariga koʻra, Koreyada u ertalabki soat toʻrtda uygʻonishiga toʻgʻri kelmoqda.
Uchrashuvda 50 ga yaqin kishi — «El-yurt umidi» jamgʻarmasi stipendiatlari, tadbirkorlar, yosh olimlar va talabalar ishtirok etdi. Prezident ularga Oʻzbekiston-Koreya munosabatlarining rivojlanishi haqida gapirib berdi, ularning takliflarini tingladi va yoshlarni xorijdagi oʻqish va hayot davrini qadrlashga chaqirib, bu davrni eng baxtli damlardan biri deb atadi.
Suhbat davomida Shavkat Mirziyoyev oʻz ish grafigi tafsilotlari bilan ochiq boʻlishdi. U tashrif davomida ertalabki soat toʻrtda uygʻonishga majbur boʻlayotganini, Oʻzbekiston bilan toʻrt soatlik vaqt farqi esa salomatligiga ogʻir taʼsir qilayotganini maʼlum qildi. Prezident tinimsiz chiqishlar va katta yuklama tufayli unga hatto suv uzatishga ham ulgurishmayotganini hazil aralash aytib oʻtdi.
Zaldan yangragan uning yaxshi koʻrinishi haqidagi fikrga davlat rahbari tabassum bilan: «Harakat qilyapman, harakat qilyapman», deb javob qaytardi.
Charchoqqa qaramay, Shavkat Mirziyoyev vatandoshlar bilan uchrashuv unga kuch bagʻishlaganini tan oldi.
«Ishlamagunimizcha toʻxtamaymiz — bizga 40 million aholi qarab turibdi», — deya taʼkidladi u.
Prezident, shuningdek, koreyalik hamkorlarning ijobiy kayfiyati va samimiyligi butun Oʻzbekiston delegatsiyasini ruhlantirayotganini qayd etdi.
16 sentyabr kuni Seulda «Markaziy Osiyo — Koreya Respublikasi» sammiti rejalashtirilgan.