Tigray kuchlari Efiopiya shimolidagi bosh aeroportni politsiyadan tortib oldi, deb xabar berdi mahalliy aholi BBC’ga
Hukumat va TXOF (TPLF) oʻrtasidagi keskinlik kuchayib borar ekan, shimoliy mintaqada urushning qayta boshlanishidan xavotirlar mavjud.
Tigray kuchlari Efiopiya shimolidagi bosh aeroportni politsiyadan tortib oldi, deb xabar berdi mahalliy aholi BBC’ga
Mekelledagi aeroport odatda Efiopiya milliy politsiyasi xodimlari tomonidan qoʻriqlanadi.
Efiopiya shimolidagi Tigray mintaqasi aholisi BBC’ga mahalliy kuchlar mintaqa poytaxti Mekelledagi aeroport nazoratini federal politsiyadan tortib olganini maʼlum qildi.
Hozirda aeroportga hech qanday reyslar amalga oshirilmayapti va Ethiopian Airlines aviakompaniyasi Tigraydagi «hozirgi vaziyat» tufayli Mekelle, shuningdek, Shire va Aksum shaharlariga parvozlarni toʻxtatganini bildirdi.
Joriy yilda hukumat va Tigrayni boshqarayotgan Tigray xalq ozodlik fronti (TXOF) partiyasi oʻrtasida keskinlik kuchayib bormoqda, bu esa fuqarolar urushi qayta boshlanishi xavfini oshirmoqda.
Yakshanba kuni TXOF Addis-Abebadagi hukumatni agʻdarish maqsadida Efiopiyadagi oltita qurolli guruh bilan ittifoq tuzganini eʼlon qildi.
Tigraydagi ikki yillik urush 2022 yil noyabr oyida yakunlangan edi, biroq hozirda har ikki tomon bir-birini Afrika Ittifoqi vosichiligida tuzilgan tinchlik bitimini buzishda ayblamoqda.
Bu ushbu asrning eng qonli mojarolaridan biri boʻldi, Afrika Ittifoqi vositichisining hisob-kitoblariga koʻra, janglar mintaqani ochlik yoqasiga olib kelishi oqibatida 600 000 ga yaqin odam halok boʻlgan.
Parvozlarning toʻxtatilishi Tigrayda bir qator dron zarbalari berilgani haqidagi xabarlardan keyin yuz berdi.
Seshanba kuni janubdagi Alamata shahrida berilgan zarba oqibatida kamida 14 kishi halok boʻldi va yana 22 kishi yaralandi, deb xabar berdi Tigray rasmiylari.
Shahar meri Mogos Shiferav BBC’ga soat taxminan 03:30 dan boshlab beshtadan ortiq dron va bitta qiruvchi samolyot 21 dan ortiq zarba berganini aytdi.
«Bu shahrimizda katta ruhiy jarohatga sabab boʻldi va odamlarimiz vahima ichida qoldi», dedi u.
Mogos halok boʻlganlar va yaralanganlarning barchasi tinch aholi vakillari ekanini aytdi va federal kuchlarni ikkita oʻrta maktabni nishonga olganlikda aybladi.
Uning soʻzlariga koʻra, maktablarga Tigray kuchlari ulardan foydalanayotganlikda gumon qilinib zarba berilgan deb taxmin qilinmoqda.
Biroq merning taʼkidlashicha, fuqarolar urushi paytida federal harbiy bazalar sifatida foydalanilgan maktablar boʻsh boʻlgan, chunki oʻquv yili hali boshlanmagan edi.
BBC bu daʼvolarni mustaqil ravishda tasdiqlamadi, hukumat esa ommaviy ravishda izoh bermadi.
Chorshanba kuni Tigray rasmiylari Addis-Abebani mintaqa aholisiga qarshi ochiq bosqin boshlashda ayblab, aholini mahalliy kuchlarni qoʻllab-quvvatlashga va birdam boʻlishga chaqirdi.
Shu bilan birga, AQSh Davlat departamentining Afrika masalalari boʻyicha byurosi dushanba kuni sodir boʻlgan va oziq-ovqat yordami olib ketayotgan katolik mashinalari karvonini nishonga olgan alohida dron zarbasini qoraladi.
U tergov oʻtkazishga chaqirdi va barcha tomonlarni kelishmovchiliklarni muloqot orqali hal qilishga hamda shunga oʻxshash hodisalarning oldini olish choralarini koʻrishga undadi.
Addis-Abeba ham, TXOF rahbarlari ham 2022 yil noyabrida mojaroga rasman chek qoʻygan Pretoriya kelishuvining asosiy bandlarini bajarishni kechiktirayotgani uchun tanqid qilinmoqda.
Iyul oyida Bosh vazir Abiy Ahmed parlamentdagi nutqi chogʻida TXOFni yangi mojaroga tayyorgarlik koʻrayotganlikda ayblagan edi.
May oyidagi umumiy saylovlar arafasida TXOF Abiy tomonidan tayinlangan muvaqqat maʼmuriyatni tarqatib yuborib, urushdan oldingi maʼmuriyatini qayta tikladi.
Shuningdek, TXOF yoshlarni oʻz kuchlariga qoʻshilish uchun majburan safarbar qilayotgani haqida xabarlar tarqaldi.