«Temir daftar»dagi mingdan ortiq oila bepul quyosh panellarini oladi
«Temir daftar»dagi mingdan ortiq oila bepul quyosh panellari bilan taʼminlanadi
Oʻzbekistonda kam taʼminlangan oilalar va ijtimoiy soha obʼyektlariga quyosh panellarini bepul oʻrnatish loyihasi yakunlanmoqda. Yakuniy bosqichda «Temir daftar»ga kiritilgan 1 197 ta oila ushbu uskunalarni oladi.
Yorqin Xonadon loyihasi Oʻzbekiston Energetika vazirligi tomonidan Saudiya Arabistonining Acwa va Xitoyning China Southern Power Grid International (CSGI) kompaniyalari bilan hamkorlikda amalga oshirilmoqda. Dasturning umumiy byudjeti 20 million dollarni tashkil etadi.
Yangi bosqich Qoraqalpogʻiston, Samarqand va Buxoro viloyatlarini qamrab oladi. Barcha oʻrnatiladigan panellarning 65 foizi Qoraqalpogʻiston hissasiga toʻgʻri keladi. Qabul qiluvchilar roʻyxati viloyat hokimliklari bilan birgalikda «Temir daftar» reyestri asosida shakllantirilmoqda.
Bundan avval loyiha doirasida 1580 ta oila va 334 ta ijtimoiy soha obʼyekti quyosh panellari bilan taʼminlangan edi. Ular orasida Sirdaryo, Buxoro, Toshkent va Navoiy viloyatlari, shuningdek, Qoraqalpogʻistondagi maktablar, bogʻchalar va qishloq shifokorlik punktlari bor.
Yakuniy bosqichni hisobga olgan holda, dastur bilan qamrab olingan oilalar va ijtimoiy soha obʼyektlarining umumiy soni 3,1 mingdan oshadi.
Energetika vaziri Sherzod Xoʻjayev loyiha mamlakatda qayta tiklanuvchi energiya manbalaridan foydalanishni kengaytirish fonida amalga oshirilayotganini taʼkidladi. Uning soʻzlariga koʻra, quyosh panellarini oʻrnatish bir vaqtning oʻzida ijtimoiy vazifani hal qiladi va energiya tizimiga tushadigan yuklamani kamaytirish imkonini beradi.
«Bugungi kunda Oʻzbekiston qazib olinadigan yoqilgʻiga qaramlikni kamaytirish va atrof-muhitga taʼsirni kamaytirish maqsadida ekologik toza energiya manbalari ulushini faol ravishda oshirmoqda. Bu boradagi amaliy qadamlardan biri muhim ijtimoiy vazifani hal etuvchi Yorqin Xonadon loyihasi boʻldi. U aholining eng muhtoj qatlamlari va ijtimoiy muassasalarni bepul va uzluksiz elektr energiyasi bilan taʼminlaydi, shu bilan birga mamlakat energotizimiga tushadigan yuklamani kamaytiradi», — dedi vazir.
Acwa kompaniyasining Oʻzbekistondagi bosh direktori Jon Zaidi loyiha doirasida quyosh panellari bevosita oilalar xonadonlarida va ijtimoiy soha obʼyektlarida oʻrnatilayotganini maʼlum qildi.
Uning soʻzlariga koʻra, bunday uskunalardan foydalanish elektr energiyasi xarajatlarini kamaytirish imkonini beradi. Bundan tashqari, xonadonlar ishlab chiqarilgan ortiqcha elektr energiyasini tarmoqqa uzatish orqali qoʻshimcha daromad olishlari mumkin.
Yorqin Xonadon tashabbusi Prezident Shavkat Mirziyoyevning «Energiya tejovchi texnologiyalarni joriy etish va kichik quvvatli qayta tiklanuvchi energiya manbalarini rivojlantirish boʻyicha qoʻshimcha chora-tadbirlar toʻgʻrisida»gi farmoniga muvofiq amalga oshirilmoqda.
2026 yilning birinchi choragida 45,2 mingdan ortiq Oʻzbekiston fuqarosi quyosh panellari yordamida ishlab chiqarilgan elektr energiyasi uchun davlat subsidiyalarini oldi. Toʻlovlarning umumiy hajmi 73,9 milliard soʻmni tashkil etdi.