Tarixiy Kellogg's fabrikasida ishlab chiqarish yakunlandi
Zavod 1938 yilda qurilgan boʻlib, bir vaqtlar kuniga bir million quti quruq nonushta ishlab chiqargan.
Тарихий Kellogg's fabrikasida ishlab chiqarish yakunlandi
Ishlab chiqarish Uels shimolidagi Reksem shahrida joylashgan Kellogg's korxonasiga koʻchirilmoqda
Qariyb 90 yildan soʻng, Katta Manchesterdagi Kellogg's fabrikasida ishlab chiqarish yakunlandi, buning oqibatida 360 ga yaqin ish oʻrni qisqartirildi.
Trafford Parkdagi ushbu majmua 1938 yilda qurilganida Yevropaning eng yirik donli mahsulotlar (quruq nonushtalar) fabrikalaridan biri edi, biroq endilikda ishlab chiqarish kompaniyaning Uels shimolidagi Reksem shahrida joylashgan korxonasiga koʻchirilmoqda.
Brend egasi boʻlgan Kellanova kompaniyasi vakili ushbu majmua oʻnlab yillar davomida muvaffaqiyatning muhim qismi boʻlib kelganini taʼkidlab, shunday qoʻshimcha qildi: "Biz u yerda mehnat qilgan barchaga, shuningdek, biz bilan birga faoliyat yuritgan yetkazib beruvchilar, hamkorlar va mahalliy hamjamiyatga minnatdorchilik bildiramiz".
Izoh olish uchun Usdaw chakana savdo kasaba uyushmasiga murojaat qilindi.
2024 yilda Kellanova nonushta uchun quruq mahsulotlar ishlab chiqarishni Reksemga koʻchirishini eʼlon qilib, fabrika faoliyatini saqlab qolish uchun zarur boʻlgan investitsiyalar oʻzini oqlamasligini aytgan edi.
Bu qaror kasaba uyushmasi va xodimlar vakillari bilan uch oylik muzokaralar yakunlanganidan keyin qabul qilindi.
Majmuadagi ishlab chiqarishning soʻnggi haftasini qayd etar ekan, kompaniya vakili shunday dedi: "Shu haftada muhim bosqichga erishildi, chunki ishlab chiqarish va qadoqlash boʻyicha barcha jarayonlar yakuniga yetdi".
Ularning taʼkidlashicha, oʻtish davridagi asosiy ustuvor vazifa "ushbu oʻzgarishlar davrida hamkasblarni va keng jamoatchilikni qoʻllab-quvvatlash" boʻlgan.
Trafford Parkdagi majmua bir vaqtlar Yevropaning eng yirik oziq-ovqat ishlab chiqarish obʼyektlaridan biri edi.
Kellogg's — 1906 yilda Michiganda tashkil etilgan Amerika kompaniyasidir. U Buyuk Britaniyaga mahsulot eksport qilishni 1922 yilda boshlagan.
Donli mahsulotlar gigantining avvalroq maʼlum qilishicha, Trafford Park fabrikasi 1930-yillar talablariga mos ravishda loyihalashtirilgan boʻlib, unda oziq-ovqat mahsulotlari eskirgan ishlab chiqarish jarayoni doirasida oltita qavat boʻylab yuqoriga va pastga harakatlantirilgan.
Majmuada bir vaqtlar kuniga bir million quti nonushta mahsulotlari, jumladan, Corn Flakes, Rice Krispies va Coco Pops ishlab chiqarilgan.
Kompaniyaning bildirishicha, Trafford Parkdagi bino maydonining yarmidan foydalanilmagan va majmuani qayta qurish juda qimmatga tushgan boʻlar edi.
Majmua yil oxirigacha ochiq qoladi.
Kellanova majmua merosini eʼtirof etish va ulugʻlash uchun mahalliy hamkorlar bilan birgalikda ishlashini hamda kelgusi oylarda ham muhim sanalarni nishonlashda davom etishini maʼlum qildi.
Firma hali ham Shimoli-Gʻarbiy mintaqada katta ishtirokka ega boʻlib, uning Solforddagi Media City hududida joylashgan Buyuk Britaniya bosh ofisida va Sent-Xelensdagi taqsimot markazida 500 ga yaqin ish oʻrni saqlanib qolmoqda.