Taqilmagan xavfsizlik kamarini endi biznes tomonidan oʻrnatilgan kameralar ham qayd etadi
1 noyabrdan Oʻzbekistonda haydovchilarning xavfsizlik kamarini taqmaganini tadbirkorlar tomonidan oʻrnatilgan kameralar orqali ham qayd etishga ruxsat berildi. Yoʻl harakati qoidalariga koʻra, ham haydovchi, ham oldingi oʻrindiqdagi yoʻlovchilar xavfsizlik kamarini taqib olishlari shart, biroq 4,5 yil davomida yoʻlovchilar uchun jarimalar toʻgʻrisidagi qonun baribir qabul qilinmadi.
Taqilmagan xavfsizlik kamari endi biznes tomonidan oʻrnatilgan kameralar orqali ham qayd etiladi
Oʻzbekiston hukumati 1 noyabrdan boshlab tadbirkorlar tomonidan oʻrnatilgan Yoʻl harakati qoidalari buzilishini foto va videofiksatsiya qilish kameralari yordamida haydovchining taqilmagan xavfsizlik kamarini qayd etishga ruxsat berdi. Bu haqda Adliya vazirligi 29 oktyabrdagi qarorga tayanib xabar berdi.
Talabga koʻra, qoidabuzarlik fakti yuqori aniqlikdagi suratlarda haydovchining yuzi bilan birga qayd etilishi kerak. «Maʼmuriy amaliyot» tizimiga qoidabuzarlik sodir etilgan sana va vaqt, shuningdek, joyning aniq koordinatalari haqidagi maʼlumotlar avtomatik ravishda uzatilishi lozim.
YHXX kameralarida boʻlgani kabi, fiksatsiya vositalari elektr taʼminoti uzilgan taqdirda kamida 8 soat davomida ishlaydigan zahira elektr manbai tizimi bilan jihozlangan boʻlishi kerak.
YHQ buzilishini fiksatsiya qilish vositalari 2023 yil oktyabr oyidan boshlab taqilmagan xavfsizlik kamarini roʻyxatga ola boshlagan.
2022 yil may oyidan beri YHQda haydovchi ham, oldingi oʻrindiqdagi yoʻlovchilar ham harakatlanishni boshlashdan oldin xavfsizlik kamarini taqib olishlari kerakligi belgilab qoʻyilgan. Biroq, 4,5 yil oʻtganiga qaramay, qonunchilikka yoʻlovchilarning taqilmagan xavfsizlik kamari uchun jarima haligacha kiritilgani yoʻq.
Oʻzbekistonda orqa oʻrindiqlarda xavfsizlik kamarlaridan foydalanish, shuningdek, 7 yoshgacha boʻlgan bolalar uchun maxsus oʻrindiqlar va 7−12 yoshdagi bolalar uchun maxsus ushlab turuvchi moslamalardan foydalanish faqat tavsiya xususiyatiga ega.