«Suv taqchilligi Markaziy Osiyo rivojlanishi uchun jiddiy cheklovga aylanmoqda» — Shavkat Mirziyoyev
Oʻzbekiston Prezidenti Markaziy Osiyo mamlakatlarini suv va iqlim oʻzgarishi masalalarini birgalikda hal qilishga chaqirdi. «Suv resurslari taqchilligi Markaziy Osiyo rivojlanishi uchun jiddiy cheklovga aylanmoqda. Suvning katta miqdorda yoʻqotilishi mintaqaga juda qimmatga tushmoqda», — dedi Shavkat Mirziyoyev.
«Suv taqchilligi Markaziy Osiyo rivojlanishi uchun jiddiy cheklovga aylanmoqda» — Shavkat Mirziyoyev
Suv resurslari va iqlim oʻzgarishi masalalari Markaziy Osiyo mamlakatlarining birgalikdagi yechimlarini talab etadi. Bu haqda Oʻzbekiston prezidenti Shavkat Mirziyoyev 8 oktyabr kuni Turkmanistonning «Avaza» milliy sayyohlik zonasida boʻlib oʻtgan Markaziy Osiyo davlatlari va Ozarbayjon rahbarlarining sakkizinchi Maslahat uchrashuvida maʼlum qildi.
«Suv resurslari taqchilligi Markaziy Osiyo rivojlanishi uchun tobora jiddiy cheklovga aylanmoqda. Iqlim oʻzgarmoqda, aholi soni ortmoqda, qishloq xoʻjaligi va infratuzilmaga tushayotgan yuklama koʻpaymoqda. Shu bois bizda qancha suv borligi va undan qanday foydalanilayotganini aniqroq tushunishimiz zarur», — dedi Shavkat Mirziyoyev.
Prezident zamonaviy raqamli monitoring tizimlarini joriy etish, irrigatsiya tarmoqlarini modernizatsiya qilish va suv tejovchi texnologiyalarni keng qoʻllash muhimligini taʼkidladi.
«Bugungi kunda suvning katta yoʻqotishlari mintaqamizga juda qimmatga tushmoqda», — deb qayd etdi davlat rahbari.
U Markaziy Osiyoda suvdan oqilona foydalanish boʻyicha Amaliy harakatlar oʻn yilligi toʻgʻrisidagi umumiy tashabbusni toʻliq amalga oshirishga chaqirdi.
Kelgusi yilda Oʻzbekiston Orolni qutqarish xalqaro jamgʻarmasiga raislikni qabul qiladi. «Biz ushbu missiyani katta masʼuliyat deb bilamiz. Raislik davrida jamgʻarma faoliyatini yanada samarali qilish, yangi ekologik loyihalarni ishga tushirish va qoʻshimcha moliyalashtirishni jalb etishni niyat qilganmiz», — dedi prezident.
Shavkat Mirziyoyevning soʻzlariga koʻra, suv resurslaridan foydalanish masalalari boʻyicha Afgʻoniston bilan muloqotga alohida eʼtibor qaratish zarur. «Bu muloqot mintaqadagi barcha mamlakatlar manfaatlarini albatta hisobga olgan holda, doimiy va aniq mazmunga ega boʻlishi kerak», — dedi u.
Prezident, shuningdek, havoning ifloslanishi Markaziy Osiyo shaharlarining eng sezilarli muammolaridan biriga aylanayotganini taʼkidladi.
U Oʻzbekiston «Markaziy Osiyo toza havosi» xalqaro konsortsiumini tashkil etishni taklif qilganini eslatib oʻtdi.
«Uning faoliyatini aniq qoʻshma loyihadan: mamlakatlarimiz sanoat zonalari, agroklasterlari va transport uzellarini ekologik modernizatsiya qilish boʻyicha pilot Dasturidan boshlash mumkin. Bu muammo muhokamasidan atrof-muhitga yuklama ayniqsa yuqori boʻlgan joylarda amaliy ishga oʻtish imkonini beradi», — deya qoʻshimcha qildi davlat rahbari.