«Biz global savdoning asosiy quruqlikdagi yoʻnalishlaridan biriga aylanishimiz mumkin» – Shavkat Mirziyoyev
Oʻzbekiston Prezidenti Shavkat Mirziyoyev 8 oktyabr kuni Turkmanistonning «Avaza» milliy turistik zonasida boʻlib oʻtgan Markaziy Osiyo davlatlari va Ozarbayjon rahbarlarining sakkizinchi Maslahat uchrashuvida ishtirok etdi.
«Biz global savdoning asosiy quruqlikdagi yoʻnalishlaridan biriga aylanishimiz mumkin» – Shavkat Mirziyoyev
Davlat rahbari oʻz nutqida soʻnggi yillarda Markaziy Osiyoda roʻy bergan ijobiy oʻzgarishlarni qayd etdi. Oʻzbekiston yetakchisi taʼkidlaganidek, bunda Markaziy Osiyo davlatlari rahbarlarining Maslahat uchrashuvlari muhim rol oʻynadi.
U XXI asrda Markaziy Osiyoni rivojlantirish yoʻlidagi doʻstlik, yaxshi qoʻshnichilik va hamkorlik toʻgʻrisidagi shartnomani imzolash tartib-taomillari yakunlanganining tarixiy ahamiyatini alohida qayd etdi.
Mintaqaviy jarayon doirasida serhasham tuzilmalar yaratishga intilish yoʻqligi taʼkidlandi.
– Bizga kuchli, suveren va mustaqil davlatlar oʻzaro hurmat, ishonch va pragmatizm asosida hamkorlik qiladigan moslashuvchan va tushunarli format kerak, – dedi Shavkat Mirziyoyev.
Soʻngra Oʻzbekiston yetakchisi Markaziy Osiyo mamlakatlarining yaqinlashuvi yuz berayotgan murakkab xalqaro vaziyatga qisqacha baho berdi.
– Dunyo tez oʻzgarmoqda, keskinlik kuchaymoqda, savdo va transport aloqalari qayta qurilmoqda, yangi xavf-xatarlar paydo boʻlmoqda, – deb taʼkidladi davlat rahbari.
Shu munosabat bilan, hamkorlikning ayniqsa muhim yoʻnalishlari boʻyicha kelgusi qoʻshma faoliyatni yanada jipsroq muvofiqlashtirish ahamiyati koʻrsatib oʻtildi.
Eng avvalo, tarixiy, iqtisodiy va transport aloqalariga ega boʻlgan mintaqalar bilan yagona hamkorlik makonini barpo etish gʻoyasi ilgari surildi. Savdo, transport, energetika, sanoat va yangi texnologiyalarni birgalikda rivojlantirish hisobiga ushbu aloqalarni ancha mustahkamlash va aniq mazmun bilan toʻldirish uchun ochilayotgan imkoniyatlardan foydalanish taklif etildi.
Shuningdek, ushbu masalalarni kelgusi yili Toshkentda boʻlib oʻtadigan «Tinchlik va barqaror oʻzaro bogʻliqlik yoʻlida mintaqalararo muloqot: Markaziy Osiyo yondashuvi» xalqaro konferentsiyasida batafsil muhokama qilish taklif qilindi.