Markaziy Osiyo va Koreya 20 milliard dollarga koʻz tikdi: Mirziyoyev beshta yangi yoʻnalishni taklif qildi
Oʻzbekiston Prezidenti Shavkat Mirziyoyev 16 sentyabr kuni Seulda boʻlib oʻtgan birinchi «Markaziy Osiyo — Koreya Respublikasi» sammitida hamkorlikning beshta strategik yoʻnalishi boʻyicha takliflarni ilgari surdi. Janubiy Koreya Prezidenti Li Chje Myon raisligida oʻtgan sammitda Qozogʻiston, Qirgʻiziston, Tojikiston, Turkmaniston va Oʻzbekiston yetakchilari ishtirok etdi. Asosiy takliflardan biri «Markaziy Osiyo […] uzoq muddatli qarashini shakllantirish boʻldi.
Markaziy Osiyo va Koreya 20 milliard dollarga koʻz tikdi: Mirziyoyev beshta yangi yoʻnalishni taklif qildi
Oʻzbekiston Prezidenti Shavkat Mirziyoyev 16 sentyabr kuni Seulda boʻlib oʻtgan birinchi «Markaziy Osiyo — Koreya Respublikasi» sammitida hamkorlikning beshta strategik yoʻnalishi boʻyicha takliflarni taqdim etdi.
Janubiy Koreya Prezidenti Li Chje Myon raisligida oʻtgan sammitda Qozogʻiston, Qirgʻiziston, Tojikiston, Turkmaniston va Oʻzbekiston yetakchilari ishtirok etdi.
Asosiy tashabbuslar qatorida «Markaziy Osiyo — Koreya Respublikasi: ilgarilab boruvchi taraqqiyot sherikligi» uzoq muddatli qarashini shakllantirish belgilandi. Ushbu hujjat sunʼiy intellektni rivojlantirish, iqlim va suv xavf-xatarlari, raqamli xavfsizlik, taʼlim va inson kapitalini rivojlantirish kabi muammolarni hisobga olishi koʻzda tutilgan.
Iqtisodiy blokda Oʻzbekiston mintaqa mamlakatlari va Koreya sanoat va savdo vazirlarining uchrashuvlari uchun maydoncha yaratishni taklif qildi. Ushbu tashabbusning vazifalaridan biri — 2030 yilga borib oʻzaro tovar ayirboshlash hajmini 20 milliard dollarga yetkazishdir.
Bundan tashqari, Oʻzbekistonda «Markaziy Osiyo — Koreya» sanoat-texnologik parkini tashkil etish gʻoyasi ilgari surildi, u sanoat kooperatsiyasi, innovatsiyalarni joriy etish va mintaqaviy bozor uchun mahsulot ishlab chiqarish maydonchasiga aylanishi kerak.
Alohida yoʻnalish sifatida muhim mineral resurslar tilga olindi. Oʻzbekiston Muhim minerallar boʻyicha mintaqaviy investitsiyaviy alyans tuzishni taklif qildi. U geologiya-qidiruv va qazib olishdan tortib, xomashyoni chuqur qayta ishlash va yuqori qoʻshilgan qiymatli mahsulotlar ishlab chiqarishgacha boʻlgan ishlab chiqarish zanjirlarini shakllantirishga koʻmaklashishi kutilmoqda.
Toʻrtinchi yoʻnalish sifatida iqlim sohasidagi hamkorlikni yoʻlga qoʻyish taklif etildi. Gap yashil taraqqiyot va iqlim oʻzgarishiga moslashish sohasida birgalikda yechimlar topishga qaratilgan Markaziy Osiyo va Koreya oʻrtasida Iqlim va uglerod sherikligi formatini ishga tushirish haqida bormoqda.
Beshinchi yoʻnalish inson kapitalini rivojlantirish va yoshlar bilan bogʻliq. Oʻzbekiston «buyurtma — tayyorlash — ishga joylashtirish» tamoyili asosida uzoq muddatli sheriklikni taklif qildi, bu iqtisodiyot ehtiyojlari, mutaxassislar tayyorlash va ularni keyinchalik ishga joylashtirish oʻrtasida yanada jipsroq aloqani nazarda tutadi.
Alohida eʼtiborni sunʼiy intellekt va boshqa texnologik yoʻnalishlarda yosh mutaxassislarni tayyorlashga qaratish taklif etilmoqda.
Sammitda xavfsizlik, amaliy iqtisodiy hamkorlik va gumanitar almashinuv masalalari ham muhokama qilindi. Uchrashuv yakunlari boʻyicha Seul deklaratsiyasi va hamkorlikning ustuvor yoʻnalishlari boʻyicha qator hujjatlar qabul qilindi.
Oʻzbekiston, shuningdek, kelgusi yili Janubiy Koreya bilan diplomatik munosabatlar oʻrnatilganining 35 yilligi va koreys diasporasining Markaziy Osiyoda yashayotganining 90 yilligiga bagʻishlangan tadbirlarni oʻtkazishga tayyorligini maʼlum qildi.