Suv taʼminoti kompaniyalari ustidan nazorat organiga qilingan shikoyatlar 84 foizga oshdi
Koʻpgina shikoyatlar mijozlar toʻlov varaqlarida keskin oʻsishni koʻrganlaridan keyin narxlarning hamyonbopligi bilan bogʻliq boʻldi.
Suv kompaniyalari ustidan nazorat organiga qilingan shikoyatlar 84 foizga oshdi
Uy xoʻjaliklarining suv taʼminoti kompaniyalari ustidan soha nazorat organiga qilgan shikoyatlari soni bir yil ichida rekord darajada — 84 foizga oshdi, bunga isteʼmolchilarning xavotirlari va toʻlovlarning oshishi bilan bogʻliq tushunmovchiliklar sabab boʻldi.
Suv isteʼmolchilari kengashi (CCW) ushbu yillik oʻsish tashkilotning 20 yillik tarixidagi eng katta koʻrsatkich boʻlganini va koʻplab odamlarning «naqadar norozi» ekanini koʻrsatganini maʼlum qildi.
Ofwat (Suv xizmatlarini tartibga solish boshqarmasi) ham kompaniyalarga 2025 va 2030 yillar oraligʻida toʻlovlarni 36 foizga oshirishga ruxsat berdi.
Kompaniyalar manfaatlarini ifodalovchi Water UK tashkiloti toʻlovlarning oshishi hech qachon mamnuniyat bilan kutib olinmasligini tan olishini, biroq bu mablagʻlar «muhim modernizatsiya ishlarini moliyalashtirish uchun» zarurligini bildirdi.
Nazorat organiga kelib tushgan umumiy shikoyatlar soni oʻtgan yilgi 8 235 tadan 2025-26 yillarda 15 115 taga yetdi.
Shu bilan birga, uy xoʻjaliklari tomonidan toʻgʻridan-toʻgʻri suv kompaniyalariga qilingan shikoyatlar soni (bu CCW'ga murojaat qilishdan oldin amalga oshirilishi kerak boʻlgan majburiy bosqichdir) 56 foizga oshib, 321 347 tani tashkil etdi.
CCW'ga qilingan shikoyatlarning uchta asosiy mavzusi hisoblagich boʻyicha toʻlovlar, toʻlov qobiliyati va hisob-kitoblarni boshqarish bilan bogʻliq boʻldi.
CCW bosh ijrochi direktori Mayk Keylning aytishicha, bu raqamlar «koʻpchilik odamlar suv xoʻjaligi sohasidagi vaziyatdan hali ham naqadar norozi ekanligini aks ettiradi».
Uning soʻzlariga koʻra, isteʼmolchilar toʻlovlar oshishining «foydasini koʻrishga sabrsizlik qilmoqdalar».
«Kompaniyalar oʻz mijozlariga haqiqiy yaxshilanishlarga erishish uchun odamlarning pullarini qanday investitsiya qilayotganlari haqida aniq va ochiq maʼlumot berishlari kerak».
CCW har bir suv kompaniyasining faoliyatini ularga xizmat koʻrsatiladigan har 10 000 uy xoʻjaligiga toʻgʻri keladigan shikoyatlar soni va isteʼmolchilar oʻz shikoyatlarini hal qilish uchun qanchalik koʻp harakat qilishlari kerak boʻlganiga qarab baholadi.
Thames Water va South West Water kompaniyalari har ikkala koʻrsatkich boʻyicha «yomon» deb baholandi.
Thames kompaniyasining chakana savdo boʻyicha direktori Devid Byord «oʻzlari kutgan xizmatni ololmagan» mijozlardan uzr soʻradi.
«Biz toʻlovlarning tushunarsizligi alohida norozilik manbai boʻlganini bilamiz, shu boshli ularni tushunish osonroq boʻlishi uchun qayta loyihalashtirish dasturini ishga tushirdik», dedi u.
Thames'ning oʻrtacha mijozi uchun toʻlovlar 2024 yilda 31 foizga oshgan boʻlsa, bu yil bu koʻrsatkich ancha past — 3,4 foizni tashkil etdi.
South West Water kompaniyasi shunday dedi: «Mijozlarimiz tajribasini yaxshilash uchun hali koʻp ish qilishimiz kerakligini bilamiz. Biz takroriy murojaatlarni kamaytirish, odamlar biz bilan birinchi marta bogʻlanganda muammolarni hal qilish va ularning aniq hamda oʻz vaqtida maʼlumot olishlarini taʼminlash orqali choralar koʻrmoqdamiz».
Portsmouth Water va Bristol Water har ikkala koʻrsatkich boʻyicha «yaxshi» baho olgan yagona kompaniyalar boʻldi va sohadagi eng yaxshi ijrochilar sifatida reytingdagi yetakchi oʻrinlarini saqlab qoldi.
Ofwat infratuzilma va atrof-muhitga boʻlgan yuqori bosimni qoplash uchun 13 ta kompaniyaga toʻlovlarni oshirishni tasdiqladi.
Ushbu kompaniyalardan beshtasiga — Thames, Severn Trent Water, Southern Water, Wessex Water va South East Water — 2024 yildayoq toʻlovlarni oshirishga ruxsat berilgan edi.
Water UK sohaviy tashkiloti vakili shunday dedi: «Toʻlovlarning oshishi hech qachon mamnuniyat bilan kutib olinmasligini tushunamiz, biroq bu pullar suv taʼminotimizni xavfsiz qilish, iqtisodiy oʻsishni qoʻllab-quvvatlash va daryolarimiz hamda dengizlarimizga oqova suvlar tushishini toʻxtatish uchun muhim modernizatsiya ishlarini moliyalashtirishga zarur».
Vakilning taʼkidlashicha, shikoyatlarning 94 foizi «isteʼmolchilar tashkilotining keyingi aralashuviga ehtiyoj qoldirmasdan, imkon qadar erta bosqichda hal qilinmoqda».
«Soha mijozlar bilan muloqotni yaxshilash va ularning pullari ular kutayotgan yaxshilanishlarga qanday sarflanayotganini aniq koʻrsatish tarafdori boʻlib qoladi», deya qoʻshimcha qildi vakil.