Superliga. “So‘g‘diyona” o‘z maydonida “Qizilqum”ni mag‘lub etdi, “Buxoro” yirik hisobda “Neftchi” ustidan g‘alaba qozondi

Superliga: "So‘g‘diyona" o‘z uyida "Qizilqum"ni mag‘lub etdi, "Buxoro" "Neftchi" ustidan yirik hisobda g‘alaba qozondi

O‘zbekiston Superligasining 18-turida bir qator qiziqarli uchrashuvlar bo‘lib o‘tdi.

**"So‘g‘diyona" — "Qizilqum"**

Turning dastlabki o‘yinida Jizzaxning "So‘g‘diyona" jamoasi Navoiyning "Qizilqum" klubini qabul qildi.

Uchrashuvning 39-daqiqasida mezbonlar hisobni ochdi: Jizzaxliklar hujumchisi Lyupcho Doriyev raqib darvozasini ishg‘ol qildi. Ikkinchi bo‘limning boshida "Qizilqum" hujumchisi Otabek Jo‘raqo‘ziyev muvozanatni tikladi. 74-daqiqada mezbonlar yana hisobda oldinga chiqib oldi: Zabihillo O‘rinboyevning uzatmasidan so‘ng bosniyalik hujumchi Zenan Zaymovich raqib darvozasiga aniq zarba berdi va hisob 2:1 ko‘rinishini oldi.

Ushbu g‘alabadan so‘ng "So‘g‘diyona" 24 ochko bilan turnir jadvalida 8-o‘ringa ko‘tarildi. "Qizilqum" esa 20 ochko bilan 11-o‘rinda joylashgan.

"So‘g‘diyona" 19-turda mehmonda "Neftchi" bilan to‘qnash keladi. "Qizilqum" esa Qarshining "Nasaf" jamoasiga qarshi o‘ynaydi.

**O‘zbekiston Superligasi, 18-tur**

**"So‘g‘diyona" — "Qizilqum" 2:1**

**Gollar:** 1:0 — Doriyev (34), 1:1 — Jo‘raqo‘ziyev (53), 2:1 — Zaymovich (74).

**"Buxoro" — "Neftchi"**

Turning yana bir qiziqarli o‘yini Buxoroda bo‘lib o‘tdi. Unda "Buxoro" jamoasi Farg‘onaning "Neftchi" klubi bilan bahs olib bordi.

Birinchi bo‘limning 37-daqiqasida Sherzod Esanov penaltidan gol urib, mezbonlarni hisobda oldinga olib chiqdi. Taym yakunida mehmonlar hisobni tenglashtirdi: Yovovichning uzatmasidan so‘ng "Neftchi" himoyachisi Nurmahammad Abdug‘aniyev boshi bilan gol urdi. Ikkinchi bo‘limning dastlabki daqiqasida Sherzod Esanov Botirali Ergashev qo‘riqlayotgan darvozani ishg‘ol qilib, dubl muallifiga aylandi. 73-daqiqada Shahboz Jo‘rayev va Javohir Ro‘ziyev kombinatsiyasini Temur Mamasidiqov muvaffaqiyatli yakunladi va farqni ikkitaga oshirdi. O‘yinga qo‘shib berilgan daqiqaning ikkinchisida "Buxoro" hujumchisi Vladimir Rodich o‘yinning yakuniy nuqtasini qo‘yib, jamoasining yirik hisobda g‘alaba qozonishiga zamin yaratdi — 4:1.

Ushbu g‘alabadan so‘ng "Buxoro" 33 ochko bilan turnir jadvalida 3-o‘rinda bormoqda. "Neftchi" esa 42 ochko bilan turnir jadvalida peshqadamlik qilmoqda.

"Neftchi" 19-tur doirasida "So‘g‘diyona"ni o‘z uyida qabul qiladi. "Buxoro" esa "Qo‘qon-1912" jamoasiga qarshi o‘ynaydi.

**O‘zbekiston Superligasi, 18-tur**

**"Buxoro" — "Neftchi" 4:1**

**Gollar:** 1:0 — Esanov, penalti (37), 1:1 — Abdug‘aniyev (45+3), 2:1 — Esanov (46), 3:1 — Mamasidiqov (73), 4:1 — Rodich (90+2).