Sudyalar maqomi toʻgʻrisidagi qonun loyihasi takomillashtirildi va Senatga yuborildi
Sudyalar maqomi toʻgʻrisidagi qonun loyihasi takomillashtirilib, Senatga yuborildi
Oliy Majlis Qonunchilik palatasi «Sudyalarning maqomi toʻgʻrisida»gi qonun loyihasini takomillashtirishni yakunladi, uni maʼqulladi va Senatga topshirdi. Hujjatda sudyalarni tayinlashning yangi tartibi nazarda tutilgan, shuningdek, ularning mustaqilligi, maqomi va intizomiy javobgarligiga oid normalarga aniqlik kiritilgan.
Asosiy oʻzgarishlardan biri vakolat muddati bilan bogʻliq. Sudyalarni birinchi marta besh yil muddatga, shundan keyin esa muddatsiz davrga tayinlash taklif etilmoqda.
Loyihani ikkinchi oʻqishga tayyorlash jarayonida deputatlar sudyalar faoliyatining asosiy printsiplari toʻgʻrisidagi normalarni ham qayta koʻrib chiqdilar. Xususan, sudya qaror qabul qilishda siyosiy qarashlardan va har qanday boshqa tashqi taʼsirdan xoli boʻlishi kerakligi alohida mustahkamlab qoʻyildi.
Qonunchilik uchun yangi boʻlgan isteʼfodagi sudya maqomi toʻgʻrisidagi qoidalarga ham aniqlik kiritildi. Bunday sudyalarga guvohnomalar berish, ularning roziligi bilan sudyalar hamjamiyati organlari ishida ishtirok etishiga va professional mediatorlik faoliyati bilan shugʻullanishiga ruxsat berish taklif etilmoqda. Bundan tashqari, ularning sudyalik davrida bildirgan fikrlari va odil sudlovni amalga oshirish bilan bogʻliq qabul qilgan qarorlariga nisbatan daxlsizlik kafolatlarini saqlab qolish rejalashtirilgan.
Shuningdek, intizomiy javobgarlikka tortish asoslari aniqlashtirildi. Xususan, «qonuniylikni qoʻpol ravishda buzish» tushunchasi ochib berildi. Bunday faktni yuqori turuvchi sud tegishli xususiy ajrimda aks ettirgan holda aniqlashi kerak boʻladi.
Takomillashtirilgandan soʻng deputatlar qonun loyihasini qabul qildilar va uni Senatga koʻrib chiqish uchun yubordilar.
Shuningdek, Oʻzbekistonda sudyalikka va xalq maslahatchiligiga nomzodlarning eng kichik yoshini 35 yoshdan 30 yoshgacha pasaytirish taklif etildi.