Sudlarni mustaqil moliyalashtirish kafolatlari belgilandi
Prezident sud organlarini moliyalashtirishni istisno tariqasida Davlat byudjeti hisobidan amalga oshirishni mustahkamlovchi qonunni imzoladi. Sudlar faoliyati uchun xarajatlar iqtisodiy vaziyat yoki byudjet taqchilligining ortishidan qatʼi nazar qisqartirilishi mumkin emas, sudlar esa byudjet loyihasini tayyorlashda mustaqil ishtirok etish imkoniyatiga ega boʻladi.
Sudlarni mustaqil moliyalashtirish kafolatlari belgilandi
Prezident 11.09.2026 yildagi «Sud organlari faoliyatini moliyalashtirish toʻgʻrisida»gi OʻRQ-1177-sonli Qonunni imzoladi, ushbu hujjat sud organlari faoliyatini moliyalashtirish sohasidagi munosabatlarni tartibga soladi va Davlat byudjeti hisobidan sudlarning toʻlaqonli hamda mustaqil ishlashini taʼminlaydi.
Hujjatga koʻra, sudlarni moliyalashtirish istisno tariqasida faqat Davlat byudjeti mablagʻlari hisobidan amalga oshirilishi kerak, bunda sudlar byudjet loyihasini tayyorlashda mustaqil ravishda ishtirok etishi lozim.
Endilikda Byudjet kodeksi mamlakatdagi iqtisodiy vaziyatdan yoki byudjet taqchilligi ortishidan qatʼi nazar, sudlar faoliyati uchun ajratiladigan mablagʻlarni qisqartirishni taqiqlaydi. Bundan tashqari, keyingi yil uchun nazarda tutilgan mablagʻlar hajmi oʻtgan yilgi darajadan past boʻlmagan miqdorda shakllanishi mustahkamlab qoʻyildi.
Yangi tartibga muvofiq, Konstitutsiyaviy sud, Oliy sud va Sudyalar oliy kengashi ajratilgan mablagʻlarni mustaqil ravishda tasarruf etadi, quyi sudlar tizimida esa bu ish Sudlar faoliyatini taʼminlash departamenti tomonidan amalga oshiriladi.
Hujjat, shuningdek, Byudjet kodeksiga, «Oʻzbekiston Respublikasi Sudyalar oliy kengashi toʻgʻrisida»gi, «Oʻzbekiston Respublikasi Konstitutsiyaviy sudi toʻgʻrisida»gi va «Sudlar toʻgʻrisida»gi qonunlarga oʻzgartirishlar kiritib, ularda sudlarni moliyalashtirish xarajatlarini qisqartirishga yoʻl qoʻyilmasligi hamda har bir sud alohida bino, qoʻriqlash xizmati va avtotransport bilan taʼminlanishi haqidagi normalarni mustahkamlaydi.
Hujjat Qonunchilik maʼlumotlari milliy bazasida davlat tilida eʼlon qilingan va 12.09.2026 yildan kuchga kirdi.