Sud qaroriga koʻra, Tramp maʼmuriyati Jeyms Komining qizini noqonuniy ravishda ishdan boʻshatgan
Morin Komi oʻzining federal prokurorlik lavozimidan boʻshatilishiga otasi FQBning sobiq direktori boʻlgani sabab boʻlgan deb hisoblaydi.
Sudyaning taʼkidlashicha, Tramp maʼmuriyati Jeyms Komining qizini noqonuniy ravishda ishdan boʻshatgan
Federal sudyaning qaroriga koʻra, AQSh Adliya vazirligi Federal qidiruv byurosi (FQB) sobiq direktori Jeyms Komining qizi Morin Komini noqonuniy ravishda ishdan boʻshatgan.
2025 yil iyul oyida Nyu-Yorkdagi federal prokuror lavozimidan olib tashlangan Komi AQSh Prezidenti Donald Trampning tanqidchisi boʻlgan otasi sababli hamda uning siyosiy qarashlari haqidagi taxminlar tufayli noqonuniy ravishda boʻshatilganini aytib, hukumatni sudga bergan edi.
Dushanba kuni sudya Jessi Furman Tramp maʼmuriyati uni oʻz lavozimiga qaytarishi va unga yetkazilgan zarar uchun maosh toʻlanishi kerakligi haqida qaror chiqardi.
Adliya vazirligi matbuot kotibi oʻz bayonotida sud qaroriga qoʻshilmasligini va "tegishli vaqtda apellyatsiya bermoqchi" ekanini bildirdi.
Sudya Furman oʻz qarorida Komining ishdan boʻshatilishi AQSh Konstitutsiyasini va uning adolatli sud muhokamasiga boʻlgan huquqini buzganligini aytdi.
Uning taʼkidlashicha, AQSh bosh prokurori federal prokurorlarni ishdan boʻshatishi mumkin, ammo bu faqat "muayyan tartibda va faqat muayyan sabablarga koʻra" amalga oshirilishi kerak.
Furmanning qayd etishicha, Komi oʻz lavozimida "mamlakatdagi eng shov-shuvli ishlardan baʼzilariga tayinlangan va rahbarlari hamda hamkasblari tomonidan izchil ravishda eng yuqori eʼtiroflarga sazovor boʻlgan".
Komi vafot etgan jinsiy jinoyatchi Jeffri Epshteyn, uning sherigi Gileyn Maksvell hamda oʻtgan yili sobiq ikki sevgilisi bilan bogʻliq fohishabozlik ayblovlari boʻyicha aybdor deb topilgan xip-xop magnati Shon "Diddi" Kombsga tegishli ishlar boʻyicha ishlagan.
Furman Komiga 2025 yilning iyul oyidan to dekabr oyigacha, yaʼni yangi ishga kirgan vaqtigacha boʻlgan davr uchun berilmagan maoshni toʻlashni buyurdi.
Komining advokatlari oʻz bayonotida shunday deyishdi: "Bu mashaqqatli gʻalaba xonim Komiga, barcha davlat xizmatchilariga va qonun ustuvorligi uchun kurashayotganlarning barchasiga tegishlidir".
Komi avvalroq uni ishdan boʻshatish boʻyicha berilgan yagona tushuntirish bu qarorning "Vashington tomonidan kelgani" boʻlganini aytgan edi.
Uning advokatlari tomonidan 2025 yil sentyabr oyida berilgan shikoyatda aytilishicha, ular Komi "faqat yoki asosan otasi sobiq FQB direktori Jeyms B. Komi boʻlgani uchun yoki uning taxmin qilingan siyosiy qarashlari va eʼtiqodlari sababli yoki har ikkalasi tufayli" ishdan boʻshatilgan deb hisoblashadi.
Adliya vazirligi sudga taqdim etilgan hujjatlarda bu qaror sobiq Bosh prokuror Pem Bondi tomonidan qabul qilinganini bildirdi.
Tramp maʼmuriyati Jeyms Komiga qarshi ikki marta ayblov qoʻzgʻatgan, shu jumladan Kongressga yolgʻon gapirishda ayblagan, ammo bu ish ayblovni ilgari surgan prokuror noqonuniy tayinlangan deb topgan sudya tomonidan bekor qilingan.
Joriy yilning boshida Adliya vazirligi Komini qasddan va bilib turib prezidentning hayotiga tahdid solish hamda unga tan jarohati yetkazishda aybladi. U hech qanday qonunbuzarlik qilmaganini aytmoqda.
Bu ish Komi tomonidan 2025 yilda Instagram'da joylashtirilgan va plyajdagi chigʻanoqlardan "86 47" yozuvi yasalgani aks etgan fotosurat bilan bogʻliq. "Eyti-siks" (seksen alti) slengda "qutulish" degan maʼnoni anglatadi va prokurorlarning taʼkidlashicha, bu Trampga qarshi zoʻravonlikka undaydi.