Stiv Irvinning oilasi toʻsatdan yuz bergan oʻlimdan 20 yil oʻtib, «superqahramon» otani xotirlamoqda
Avstraliyalik mashhur shaxs 2006 yilda, suratga olish ishlari paytida skat tikani uning koʻkragiga sanchilishi oqibatida halok boʻlgan edi.
Stiv Irvinning oilasi uning fojiali oʻlimidan 20 yil oʻtib, «superqahramon» otasini xotirladi
Avstraliyalik tabiat himoyachisi Bindi Irvin mashhur otasi — koʻpchilikka «Timsohlar ovchisi» sifatida tanilgan Stiv Irvin vafotining 20 yilligi munosabati bilan unga bagʻishlangan samimiy xotiralarini oʻrtoqlashdi.
Stiv Irvin 2006 yil 4 sentyabrda, 44 yoshida, Katta toʻsiq rifida hujjatli film suratga olish paytida suv ostida skat (tikanli baliq) koʻkragiga shikast yetkazishi oqibatida halok boʻlgan edi.
Otasi vafot etganida sakkiz yoshda boʻlgan Bindi juma kuni ijtimoiy tarmoqdagi postida Stivni «superqahramon» deb taʼrifladi va soʻnggi yigirma yil davomida «oilasi bilan birga butun dunyo otasi uchun motam tutganini kuzatganini» aytdi.
«Men doim otamning merosi yovvoyi tabiatni muhofaza qilish deb oʻylardim; aslida esa uning merosi sevgi ekan. Sayyoramizga va bir-birimizga boʻlgan sevgi», — deb yozdi 28 yoshli Bindi Instagram sahifasida.
U otasining oʻlimi onasi Terri va 22 yoshli ukasi Robertga qanday taʼsir qilgani haqida gapirdi.
«Onam hayotining mazmuni boʻlgan insonini yoʻqotdi; ukam va men esa eng buyuk otadan ayrildik», — deb yozdi u. «Qaygʻu bizni hech qachon butunlay tark etmaydi; biz har kuni u bilan birga yashaymiz».
Bindi, shuningdek, qizi hech qachon koʻrmagan bobosi bilan oʻzini qanday bogʻliq his qilishi haqida soʻzlab berdi.
«Mening 5 yoshli qizim bor, u har tongda uning hujjatli filmlarini tomosha qiladi. U oʻz „timsoh bobosi“ni hech qachon koʻrmagan boʻlsa-da, uning cheksiz mehrini his qiladi».
Stivning oʻlimidan beri Irvinlar oilasi Kvinslenddagi «Australia Zoo» hayvonot bogʻini boshqarishda davom etmoqda.
«Otam shu qadar chuqur va unutilmas iz qoldirdiki, buning aks-sadosi avlodlar osha yangrayveradi», — deb yozdi Bindi va uning hayoti hamda merosi «nishonlanishga loyiq» ekanini taʼkidladi.
U Stivga oilaning «qoʻriqchi farishtasi» boʻlgani uchun minnatdorchilik bildirdi va oʻz maktubini uni «butun qalbi bilan» yaxshi koʻrishini aytib yakunladi.
Stivning rafiqasi Terri ham ushbu kun munosabati bilan ijtimoiy tarmoqlarda post qoldirdi va unda doim harbiy rangdagi (xaki) kiyimda yuradigan tabiat himoyachisi Bindining tugʻilishi va bu unga qanday taʼsir qilgani haqida gapirgan intervyusini ulashdi.
«Hayotimdagi eng ajoyib yovvoyi tabiat bilan uchrashuv — bu qizim Bindining tugʻilishi boʻlgan», — deydi Stiv intervyuda oʻziga xos gʻayrat bilan.
U yangi tugʻilgan chaqalogʻini ilk bor qoʻliga olganida, unga ism qoʻyish gʻoyasi paydo boʻlgan.
«Men hayratda qoldim va oʻshanda uning ismi dunyoga keldi. Men sevimli timsohim Bindi sharafiga „Bindi!“ deb yubordim», — dedi u keng tabassum bilan.
Robert Irvin ham otasini xotirlab, Stiv uni goʻdakligida qoʻlida ushlab turgan suratni joylashtirdi va unga «Sening merosing abadiydir» deb izoh qoldirdi.
Robert opasi xuddi shu unvonni qoʻlga kiritganidan oʻn yil oʻtib, AQShning «Dancing with the Stars» (Yulduzlar bilan raqs) raqs tanlovi gʻolibi deb topildi.