Sochi yaqinida neft tankeri yondi: plyajlar yopilib, aholiga derazalarni ochmaslik soʻraldi
Qora dengizda, Sochi sohillari yaqinida AFRAMAX RIO neft tankerida yongʻin chiqdi. Hodisa sababli «Sirius» hududidagi plyajlar vaqtincha yopildi, aholiga koʻchada uzoq qolmaslik va imkoni boricha derazalarni ochmaslik tavsiya etildi. Kemadagi 23 nafar ekipaj aʼzosi qutqarilgan.
Sochi yaqinida neft tankeri yonib ketdi: plyajlar yopildi, aholiga derazalarni ochmaslik tavsiya qilindi
Yongʻin yuz bergani haqida 6-oktabr kuni «Sirius» federal hududi maʼmuriyati rahbari Dmitriy Plishkin xabar berdi.
Rossiya Transport vazirligi maʼlumotiga koʻra, Liberiya bayrogʻi ostida neft tashiyotgan tankerga ekipajsiz katerlar hujum qilgan. Vazirlik dengiz akvatoriyasida neft yonayotganini maʼlum qilgan.
Idora izohiga koʻra, qutqaruv kemalari tankerga xavfsiz yaqinlasha olishi uchun olov kuchi pasayishini kutish kerak. Shundan keyingina yongʻinni oʻchirish ishlariga kirishish mumkin boʻladi. Vazirlik hodisa oqibatlarini bartaraf etish uchun yetarli kuch va vositalar mavjudligini taʼkidlagan.
Transport vazirligi bergan maʼlumotga koʻra, ekipajning barcha 23 aʼzosi Hindiston fuqarolari boʻlib, ular qutqarilgan. Avval Mash Telegram-kanali ikki kishi jarohat olganini yozgan edi. Ammo vazirlikning keyingi bayonotida dastlabki maʼlumotlarga koʻra jabrlanganlar yoʻqligi aytilgan.
Astra nashriga koʻra, AFRAMAX RIO 100 ming tonnagacha neft tashish imkoniyatiga ega. Mash esa tanker Novorossiyskdan Hindistonga xom neft olib ketayotganini va deyarli toʻliq yuklanganini yozgan.
The Insider nashri kemaning Rossiya «soya floti»ga aloqador boʻlishi mumkinligini bildirgan. DW maʼlumotiga koʻra, tanker Yevropa Ittifoqi va AQSH sanksiya roʻyxatlariga kiritilmagan, biroq Ukraina unga nisbatan cheklovlar joriy qilgan.
Hodisa Qora dengizda kemalarga hujumlarni toʻxtatish boʻyicha ilgari bildirilgan takliflar fonida yuz berdi. Turkiya tashqi ishlar vaziri Hoqon Fidan 8-avgust kuni Anqara Rossiya va Ukrainaga dengizdagi kemalarga zarbalar berishga moratoriy joriy etishni taklif qilganini aytgan edi.
Biroq 14-avgustda Rossiya TIV rasmiy vakili Mariya Zaxarova Moskva bunday sulhga rozi boʻlish uchun asos koʻrmayotganini bildirgan. U Turkiyadan rasmiy murojaat kelmaganini ham taʼkidlagan.