Soʻnggi bank avtomatini yoʻqotayotgan shaharda bepul bankomat oʻrnatish talab qilinmoqda
Hisobotda Yorkshir-Deyls shahri uchun bepul bankomat taqdim etilishi tavsiya etilgan.
Soʻnggi bank bankomatidan mahrum boʻlish arafasida turgan shaharchada bepul bankomat oʻrnatish talablari kuchaymoqda.
Xous (Hawes) shahridagi Barclays filiali 2019 yilda yopilgan edi, biroq undan foydalanish bepul boʻlgan pul yechish apparati oʻz joyida qolgandi.
Endilikda, mustaqil tahlil aholining naqd pul yechib olish imkoniyati saqlanib qolishi kerakligini koʻrsatganidan soʻng, Yorkshir-Deyls shaharchasida doimiy bepul bankomatni taʼminlash choralari koʻrilmoqda.
Shu oy boshida Barclays oʻz bankomatlar tarmogʻini qayta koʻrib chiqqandan soʻng, Buyuk Britaniya boʻylab 132 ta apparatni, jumladan, Xousdagi sobiq Barclays binosida joylashganini ham olib tashlash niyatida ekanini maʼlum qildi.
Biroq LINK bankomatlar tarmogʻi bepul bankomat taqdim etilishi kerakligini tavsiya qildi, chunki bu qadam shaharchani ushbu qurilmasiz qoldiradi.
Kengash aʼzosi Ivonn Pikok (MVE) agar bepul bankomat boʻlmasa, bu «daxshatli, mutlaqo daxshatli» boʻlishini aytdi.
«Bizda ayrim doʻkonlar va hududlarda foydalanish uchun doim ham kartalar boʻlavermaydi, bundan tashqari, ulardan foydalanish tadbirkorlarga pul turadi», — deya qoʻshimcha qildi Konservatorlar partiyasi vakili.
«Shu bois, bu hududga keladigan sayyohlarga naqd puldan foydalanish imkoniyati juda zarur.
Kirbi Stivengacha 13 mil (21 km), Richmondgacha esa 27 mil (43 km) masofa bor, shunday ekan, biz naqd pulni qayerdan olamiz?»
Shimoliy Yorkshir kengashi aʼzosi Ivonn Pikok odamlar naqd pulni osongina yechib olishlari mahalliy korxonalar uchun muhim ekanini taʼkidladi.
Oʻz hisobotida LINK almashtirish xizmati odatda baholashdan keyin uch oy ichida va mavjud qurilma yopilishidan oldin ishga tushirilishi kerakligini bildirdi.
Shu bilan birga, Richmond va Nortallerton okrugidan parlament aʼzosi hamda sobiq Bosh vazir Rishi Sunakning idorasi Barclays kompaniyasidan amaldagi bankomat muqobil choralar tayyor boʻlgunga qadar ochiq qolishi haqida kafolatlar olganini maʼlum qildi.
LINK tashkilotining bildirishicha, joylashuvi hali tasdiqlanmagan yangi xizmat oʻz aʼzolari nomidan bankomatlar tarmogʻi orqali moliyalashtiriladi.
Leybern va Katterik Garnizon shaharchalari ham Barclays bankomatlaridan mahrum boʻlishi kutilmoqda, biroq bu ikkala shaharda allaqachon muqobil bepul bankomatlar mavjud.