Sirdaryo viloyatida maktab oʻquvchisining onasi dars vaqtida uning sinfdoshiga hujum qildi
Sirdaryo viloyatida maktab oʻquvchisining onasi dars paytida uning sinfdoshiga hujum qildi
Yaqinda ijtimoiy tarmoqlarda Sirdaryo viloyatidagi maktablardan birida oʻquvchi qizning onasi uning sinfdoshiga nisbatan kuch ishlatgani haqida maʼlumot tarqaldi. Vaziyat bolalar ombudsmani eʼtiborini tortdi.
Oliy Majlisning Bola huquqlari boʻyicha vakili matbuot xizmati xabar berishicha, 7 sentyabr kuni dars paytida ikki nafar 13 yoshli oʻquvchi qiz oʻrtasida nizo kelib chiqqan. Ertasi kuni qizlardan birining onasi maktabga kelib, nizoning ikkinchi ishtirokchisini sinfdan chaqirib chiqqan. Suhbat janjalga aylanib ketgan, shundan soʻng ayol jismoniy kuch ishlatib, voyaga yetmagan qizning boʻyin qismini tirnab yuborgan.
Ushbu holat yuzasidan Boyovut tumani ichki ishlar boʻlimi tomonidan tergovga qadar tekshiruv harakatlari olib borilmoqda. Sogʻliqqa yetkazilgan shikastlanish darajasini aniqlash maqsadida sud-tibbiy ekspertizasi tayinlangan.
Bundan avval bolalar ombudsmani va huquq-tartibot idoralari poytaxtdagi maktablardan birida uchinchi sinf oʻquvchisi temir bilakuzukni yutib yuborishga majburlangani bilan bogʻliq vaziyatni nazoratga olgan edi. Bola jonlantirish boʻlimiga yotqizilgan, shifokorlar unda murakkab operatsiya oʻtkazishgan.