Shimoliy vokzal yaqinidagi «Toshkent gerbi» oʻrnida 62 metrlik bayroq paydo boʻladi, yon-atrofidagi hudud obodonlashtiriladi
Poytaxtning Shimoliy vokzali yaqinidagi «Toshkent gerbi» monumenti oʻrnida 62 metrlik bayroqshtor oʻrnatiladi. Uning yon-verida favvoralar, oʻrindiqlar va savdo doʻkonchalari boʻlgan sayr hududi obodonlashtiriladi. Tuman hokimi ishtirokidagi eshituvda qanday eʼtiroz va takliflar bildirilgani — «Gazeta» materialida.
Shimoliy vokzal yaqinidagi «Toshkent gerbi» oʻrnida 62 metrlik bayroq oʻrnatiladi, tutash hudud esa tartibga keltiriladi
Vokzal yaqinidagi Taras Shevchenko koʻchasining bir qismida — sobiq «Toshkent gerbi» monumenti va Berdaq haykali oraligʻida — sayr qilish zonasini obodonlashtirish ishlari boshlandi. 3 noyabr kuni Mirobod tumani hokimi Anvar Sayfutdinov bu yerda eshituv oʻtkazib, aholiga loyiha haqida soʻzlab berdi va ularning eʼtirozlarini tingladi.
Poytaxt gerbi tushirilgan doiraviy diskni ushlab turgan qoʻllar koʻrinishidagi, 1996 yildan 2018 yilgacha mavjud boʻlgan va xalq orasida «Kopeyka» nomi bilan tanilgan monument oʻrnida Oʻzbekiston davlat bayrogʻi oʻrnatilgan 62 metrlik bayroqshtok oʻrnatiladi, uning ortida esa favvora quriladi.
Hokimiyatning rejasiga koʻra, bu yoʻlovchilar va turistlar Shimoliy vokzalga yetib kelganida koʻradigan vizual «tashrif qogʻozi»ga aylanadi.
Monument hech qanday izohlarsiz demontaj qilinganidan soʻng, uning poydevori shu yillar davomida boʻsh yotgan edi va aholi bu yerda nima paydo boʻlishini taxmin qilayotgandi. «Kopeyka»ni qayta tiklash imkoniyati haqidagi savolga Anvar Sayfutdinov salbiy javob berdi.
Obodonlashtirilishi kerak boʻlgan hududning umumiy maydoni 30 975 kv. m ni tashkil etadi, shundan 2770 kv. m maydon koʻkalamzorlashtiriladi. Loyihada 228 ta buta ekish, trotuar qoplamasini, yoritish tizimini yangilash va oʻrindiqlar, shu jumladan soyabonli oʻrindiqlar oʻrnatish koʻzda tutilgan. Yashil maydonlarni sugʻorish Solar kanalidan nasoslar orqali amalga oshiriladi.
«Hech qanday kapital qurilish boʻlmaydi — faqat obodonlashtirish», — deb vaʼda berdi hokim. Alleyaning ikkala tomonida qatnov qismining uchastkalari saqlanib qoladi. Koʻcha boʻylab tartibsiz parkovka oʻrniga pulli parkovka tashkil etiladi.
Kanal ustidagi ikkita koʻprik oraligʻidagi uchastkada favvoralar, pogʻonali terrasalar va hordiq chiqarish joylari boʻlgan zona barpo etiladi. Nukus koʻchasiga yaqinroq joylashgan mavjud favvora rekonstruktsiya qilinadi.
Koʻchada 10 ta tijorat kioski paydo boʻladi. Hokimning soʻzlariga koʻra, joylar auktsion orqali besh yil muddatga kofe, choy, sharbatlar va muzqaymoq sotish uchun ijaraga beriladi. Restoranlar yoki boshqa umumiy ovqatlanish muassasalarini ochish rejalashtirilmagan.
Loyiha doirasida koʻcha boʻylab joylashgan turar joy binolarining fasadlarini yangilash va ularni yagona uslubga keltirish ham koʻzda tutilgan.
Ushbu uchastkani rekonstruktsiya qilishni ikki oy ichida yakunlash rejalashtirilmoqda. Noyabr oyi oxirigacha Shevchenko koʻchasining boshqa qismida — Fidokor koʻchasidan Shahrisabz koʻchasigacha boʻlgan uchastkada ham ishlarni yakunlash koʻzda tutilgan. 2024 yilda Nukus va Fidokor koʻchalari oraligʻidagi 300 metr uzunlikdagi birinchi uchastka rekonstruktsiya qilingan edi. U avtomobillar harakati uchun yopilgan va poytaxtdagi birinchi shunday sayr qilish zonasiga aylangan.
Qoraqalpoq shoiri Berdaq haykali atrofidagi hudud ham obodonlashtiriladi.
Uchrashuv ishtirokchilaridan biri vokzal binosidan boʻlajak sayr qilish zonasigacha yeroʻsti piyodalar oʻtish joyini tashkil etishni taklif qildi. Hozirda yetib keluvchilar koʻchani faqat yerosti oʻtish joyi orqali kesib oʻtishlari mumkin, eng yaqin «zebra»lar esa uzoqda joylashgan.
Anvar Sayfutdinov tuman hokimiyati bunday qarorni mustaqil ravishda qabul qila olmasligini va bu masalani Yoʻl harakatini tashkil etish markazi bilan muhokama qilishini aytdi.
Aholi trotuarlarda avtomobillarning tartibsiz parkovka qilinishidan shikoyat qildi va pulli parkovka joriy etilgach, poytaxtning boshqa qismlarida boʻlgani kabi, mashinalar hovlilarga yopirilishidan xavotir bildirdi. Hokim ushbu muammo shahar darajasida hal etilgunga qadar aholidan mavjud shlagbaumlarni demontaj qilish talab qilinmasligini taʼkidladi.
Eshituv ishtirokchilari loyiha yakunlangach, sayr qilish zonasiga kim xizmat koʻrsatishi bilan ham qiziqdilar. Anvar Sayfutdinov kiosklar ijarasidan tushadigan daromadlar koʻchani boshqarish direktsiyasiga oʻtkazilishini maʼlum qildi. Ushbu mablagʻlar tozalash, yoritish haqini toʻlash va obodonlashtirish elementlarini joriy taʼmirlashga yoʻnaltiriladi.