Shavkat Mirziyoyev Vladimir Putinni Davlat dumasiga saylovlar oʻtkazilgani bilan tabrikladi
Shavkat Mirziyoyev Vladimir Putinni Davlat dumasiga saylovlar oʻtkazilgani bilan tabrikladi
Prezident Shavkat Mirziyoyev Rossiya yetakchisi Vladimir Putinga maktub yoʻllab, uni Rossiya Federal Majlisi Davlat Dumasiga saylovlar muvaffaqiyatli oʻtkazilgani bilan tabrikladi.
IX chaqiriq Davlat dumasi deputatlari saylovi Rossiyada 18-20 sentyabr kunlari boʻlib oʻtdi. 21 sentyabr holatiga koʻra, ovozlarni hisoblash hanuz davom etmoqda.
Protokollarning 95,22 foizi qayta ishlangandan keyingi dastlabki maʼlumotlarga koʻra, "Yedinaya Rossiya" 57,83 foiz ovoz olmoqda. RFKP 13,80 foiz, LDPR — 8,98 foiz, "Noviye lyudi" — 7,96 foiz toʻplamoqda. "Spravedlivaya Rossiya" 4,96 foiz ovoz olmoqda. Rossiya MSK maʼlumotlariga koʻra, saylovchilarning ishtiroki 59,32 foizni tashkil etdi.
Mirziyoyev oʻz maktubida, uning baholashicha, boʻlib oʻtgan saylovlar Rossiya jamiyatining yuqori siyosiy madaniyati va fuqarolik jipsligini namoyish etganini taʼkidladi. Maktubda saylovchilarning rekord darajadagi ishtiroki va ovoz berish natijalari alohida qayd etilgan.
Mirziyoyev, shuningdek, ushbu koʻrsatkichlar Rossiya fuqarolarining Vladimir Putin rahbarligida amalga oshirilayotgan strategik kursga boʻlgan yuqori ishonchidan dalolat berishini maʼlum qildi. Maktubda ushbu kurs mamlakatning ijtimoiy-iqtisodiy rivojlanishini davom ettirish va milliy manfaatlarini himoya qilishga qaratilgani aytiladi.
Oʻzbekiston Prezidenti ikki tomonlama munosabatlarga alohida eʼtibor qaratdi. U Oʻzbekiston va Rossiya oʻrtasidagi har tomonlama strategik sheriklik va ittifoqchilik munosabatlari rivojlanib borayotganini qayd etdi.
Mirziyoyevning soʻzlariga koʻra, ikki mamlakat munosabatlarida parlamentlararo hamkorlik muhim oʻrin tutadi. Maktubda taʼkidlanganidek, u bundan buyon ham qoʻshma loyiha va dasturlarni amalga oshirishga xizmat qilishi lozim.
Oʻzbekiston Prezidenti birgalikdagi saʼy-harakatlar bilan mamlakatlar ikki tomonlama hamkorlikni rivojlantirishga yangi surʼat bagʻishlay olishi va uni yangi tashabbuslar bilan boyita olishiga ishonch bildirdi.
Yakunda Mirziyoyev Putinga mustahkam sogʻliq va davlat faoliyatida yangi zafarlar, Rossiya xalqiga esa tinchlik, omonlik va ravnaq tiladi.