Putin Shavkat Mirziyoyevni Mustaqillik bayrami bilan tabrikladi
Putin Shavkat Mirziyoyevni Mustaqillik bayrami bilan tabrikladi
Oʻzbekiston Respublikasi Mustaqilligining 35 yilligi munosabati bilan Prezident Shavkat Mirziyoyevga xorijiy davlatlar va hukumat rahbarlaridan samimiy tabriklar kelib tushmoqda. Jumladan, Rossiya Federatsiyasi Prezidenti Vladimir Putin Oʻzbekiston rahbari va xalqiga oʻzining ezgu tilaklarini yoʻlladi.
Tabrik maktubida Oʻzbekistonning iqtisodiy va ijtimoiy rivojlanish yoʻlida dadil qadamlar bilan borayotgani hamda jahon miqyosida munosib ravishda yuqori obroʻga ega ekanligi taʼkidlangan.
"Rossiya va Oʻzbekiston oʻrtasidagi munosabatlar strategik sheriklik va ittifoqchilik xarakteriga ega. Moskva va Toshkent barcha asosiy yoʻnalishlarda samarali hamkorlikni, xalqaro masalalarda esa oʻzaro faol aloqalarni yoʻlga qoʻygan. Ishonchim komilki, bizning birgalikdagi saʼy-harakatlarimiz Rossiya va Oʻzbekistonning doʻstona xalqlari manfaatlari yoʻlida, mintaqaviy xavfsizlik va barqarorlikni mustahkamlash maqsadida sheriklik aloqalarining barcha jabhalarini yanada kengaytirishni taʼminlaydi", — deyiladi tabrik matnida.
Vladimir Putin oʻz maktubida Shavkat Mirziyoyevga mustahkam sogʻliq va muvaffaqiyatlar, Oʻzbekiston xalqiga esa baxt-saodat va farovonlik tilagan.
Eslatib oʻtamiz, joriy yilning iyun oyida Oʻzbekiston Prezidenti amaliy tashrif bilan Rossiyada boʻlgan edi. Ikki davlat rahbarlari ishtirokida Oʻzbekistondagi birinchi integratsiyalashgan atom elektr stansiyasi qurilishiga start berilgan.