Shavkat Mirziyoyev turkiy davlatlar oʻrtasida ID-kartalar orqali sayohat qilish imkoniyatlarini kengaytirishni taklif qildi
Anqaradagi yigʻilishda Oʻzbekiston yetakchisi turkiy mamlakatlar hududlarida boʻlish va chegaralarni kesib oʻtish tartibini soddalashtirishni taklif qildi.
Shavkat Mirziyoyev turkiy davlatlar oʻrtasida ID-kartalar orqali safar qilish imkoniyatini kengaytirishni taklif etdi
Bugun prezident Shavkat Mirziyoyev Anqarada oʻtkazilayotgan Turkiy davlatlar tashkiloti Davlat rahbarlari kengashining yigʻilishida ishtirok etmoqda.
Sammitda Oʻzbekiston rahbari turkiy davlatlar oʻrtasida ID-kartalar orqali safar qilish imkoniyatlarini kengaytirish, shuningdek, chegaralarni kesib oʻtish va ushbu mamlakatlar hududida boʻlish qoidalarini yengillashtirish tashabbusini ilgari surdi.
«Turizm sohasidagi ulkan imkoniyatlardan ham toʻliq foydalanishimiz zarur. Birgina 2022 yilda mamlakatlarimizga 40 milliondan ortiq xorijiy sayyoh tashrif buyurdi. Turkiy xalqlarning tarixiy shaharlari, betakror tabiati, boy madaniyati va mehmondoʻstlik anʼanalarini dunyoga birgalikda taqdim etish uchun Turkiy turistik alyansni tashkil etish vaqti keldi», — dedi davlat rahbari.
Oʻzbekiston Prezidenti xalqlarni yaqinlashtirish va ularning hayotini yengillashtirish maqsadida fuqarolarning oʻzaro safarlari toʻgʻrisida koʻp tomonlama bitim tayyorlashni ham taklif qildi.
«Unda ID-kartalar asosida safar qilish imkoniyatlarini kengaytirish, chegaralarni kesib oʻtish va qabul qiluvchi davlat hududida boʻlish tartibini yengillashtirish masalalari oʻz aksini topishi kerak», — dedi Shavkat Mirziyoyev.