Selin Dion sahnaga qaytdi: xonanda Parijdagi konsertidan rekord darajada daromad oldi

Selin Dion sahnaga qaytdi: xonanda Parijdagi konsertlaridan rekord darajada daromad oldi

Selin Dion konsertlar boshlanishidan ancha oldin Parijga yetib kelgan edi. Olti yillik tanaffusdan so‘ng sahnaga qaytayotgan xonanda har bir harakat va har bir notani puxta mashq qilib olishi kerak edi. Ko‘pchilik uning yana qo‘shiq aytishiga ishonmagandi.

Xonanda kamyob va tobora kuchayib boruvchi nevrologik kasallik — Mersh-Volman (qotib qolgan odam) sindromi bilan kurashmoqda. U bu haqda 2022-yilda ma’lum qilgan: tomir tortishishlari yurishga ham, ovoz paychalaridan odatdagidek foydalanishga ham xalaqit bergan, shu sababli Courage gastrol safarining qolgan konsertlari bekor qilingan. 2024-yilda “I Am: Celine Dion” hujjatli filmida uning xurujlari ham ko‘rsatilgan.

2026-yil avgustidagi Harper’s Bazaar intervyusida Dion kasallik alomatlari tashxis qo‘yilishidan taxminan 17 yil oldin boshlanganini aytdi. Og‘riq ba’zan shu darajada kuchli bo‘lganki, u zo‘rg‘a yurgan va og‘riq qoldiruvchi dorilarning yuqori dozasini qabul qilishga majbur bo‘lgan.

Tashxisdan so‘ng u sportchilar tayyorgarligiga o‘xshash intizomli va murakkab davolanishni boshladi. Vogue France’ga (2024) ko‘ra, u haftasiga besh kun jismoniy va vokal terapiya bilan shug‘ullanadi. Uning shifokori, nevrolog Amanda Pikenning aytishicha, bu tartib to‘liq stavkali ishdek vaqt oladi. 2026-yilga kelib dastur yanada kengaydi: yangi dori-darmonlar, fizioterapiya, vokal terapiyasi va immunoterapiyaga haftasiga uch marta 90 daqiqalik pilates hamda ikki marta balet darslari qo‘shildi. Dion uchta maqsadiga erishganini aytdi: qaddini tik tutib o‘tirish, qo‘l uchlarini oyoq barmoqlariga tekkiza olish va shpagatga o‘tish.

Muxlislar har kuni xonanda yashaydigan mehmonxona oldida kutib turishardi. Bir kuni Dion o‘zini tiya olmay, olomon qarshisida qo‘shiq kuylab, raqsga tushdi. Birinchi shoudagi chiqishida u ko‘z yoshlarini tiya olmadi.

Billboard va Boxscore ma’lumotlariga ko‘ra, sentyabrdan oktyabrgacha Plenitude Arena’da o‘tgan “Celine Dion Paris” dasturining 16 ta shousi 125,5 million dollar yalpi (gross) tushum keltirdi. Har bir kecha o‘rtacha 7,8 million dollar tushgan, jami 539 ming chipta sotilgan va zallar to‘la bo‘lgan — bu ko‘rsatkich Dionning Las-Vegasdagi bir kechalik daromadidan o‘n baravar yuqori. Biroq 125 million sof foyda emas: undan arena ijarasi, jamoa, jihozlar, logistika, soliqlar va promouterlar gonorari to‘lanadi.

2026-yil martida Dion Eyfel minorasi yonida yozilgan videoda sahnaga qaytishini e’lon qilgan va muxlislariga “Men yaxshiman, sog‘lig‘imni tiklayapman va o‘zimni yaxshi his qilyapman” degandi. Dastlab rejalashtirilgan 10 ta konsert 16 taga ko‘paydi. Londondan kelgan muxlis Xloya Raydkvist jurnalistlarga: “U afsona, u kumir. Biz ilk oqshomdayoq shu yerda bo‘lishimiz shart edi”, dedi.

Parij uning moliyaviy yo‘lining faqat bir qismi xolos. Las-Vegasdagi “Caesars Palace”da 2003–2007-yillarda o‘tgan “A New Day…” dasturi 385,1 million dollar, 2011–2019-yillardagi “Celine” dasturi (1141 ta shou) esa taxminan 296 million dollar keltirgan. Bu ikki dasturning o‘zi 680 million dollardan ortiq yalpi daromad degani. Forbes uning shaxsiy boyligini 570 million dollar atrofida baholagan. Kasallik davrida ham uning nomi daromad keltirgan: royaltilar, 220 milliondan ortiq sotilgan albomlar katalogi va parfyumeriya litsenziyalari hisobiga.

Oldinda 2027-yil mayiga rejalashtirilgan Parijdagi yana 10 ta konsert bor. Bir necha yil sahnaga chiqa olmagan xonanda hozir bir kechada qariyb 33 ming tomoshabinni to‘plamoqda.