Sara Sharifning bobosiga uning Pokistondagi singillari va uqalarining vasiyligi berildi

Sara Sharifning bobosiga uning Pokistondagi aka-uka va opa-singillarining vasiyligi berildi

Sara Sharifning aka-uka va opa-singillari Pokistonda bobosi bilan qoladi

Pokiston sudi Sara Sharifning ota tomondan bobosiga uning aka-uka va opa-singillarining vasiyligini berdi.

Ushbu qaror 10 yoshli Sara 2023 yilda otasi va oʻgay onasi tomonidan oʻldirilganidan keyin yuzaga kelgan koʻp yillik huquqiy noaniqlikdan soʻng chiqarildi.

Bolalarning bobosi ularning Britaniya fuqaroligi saqlanib qolishini va bu kelajakda Buyuk Britaniyaga qaytishni xohlash-xohlamasliklarini oʻzlari hal qilishlariga imkon berishini aytdi.

Hozirda yoshi 4 dan 16 yoshgacha boʻlgan besh nafar bolaning barchasi 2023 yildan beri Pokistonda yashab kelmoqda. Ulardan sudda sudya bilan gaplashish soʻraldi va eng kattasi ular oʻzlarini qulay his qilayotganliklarini va aka-uka hamda opa-singillar joylashib olishganini aytdi.

Sudya ularga bobosi vasiy boʻlishini aytganida, eng katta bola: «Juda yaxshi», deb javob berdi.

Besh nafar bola 2023 yilning avgustidan beri Pokistonda boʻlib turishibdi, oʻshanda ularni Sara oʻldirilganidan soʻng Saraning otasi, oʻgay onasi va amakisi u yerga olib ketishgan edi.

Militsiya bolalarni bobosining uyidan topgunga qadar oila bir necha hafta yashirinib yurgan. Ular dastlab davlat qaramogʻidagi bolalar muassasasiga joylashtirilgan.

Kattalar samolyotda Buyuk Britaniyaga qaytib kelishgan va aeroportda hibsga olingan. Saraning otasi Urfan Sharif va oʻgay onasi Beinash Batul Saraning qotilligida aybdor deb topildi. Sharif kamida 40 yilga, Batul esa kamida 33 yilga ozodlikdan mahrum etildi.

Uning amakisi Faysal Malik uning oʻlimiga sababchi boʻlish yoki yoʻl qoʻyib berishda aybdor deb topildi va 16 yilga ozodlikdan mahrum etildi.

Saraning jasadi Surrey grafligining Uoking shahridagi oilaviy xonadondan topilishidan oldin, ikki yil davom etgan «qiynoqlar kampaniyasi» paytida unga niqob kiydirilgan, yoqilgan va kaltaklangan.

Saraning otasi Urfan Sharif va oʻgay onasi Beinash Batul uning oʻlimi uchun umrbod qamoq jazosiga hukm qilindi

Pokistonda Saraning bobosiga 2023 yil oktyabr oyida uning aka-uka va opa-singillariga vaqtinchalik vasiylik berilgan edi. Boboning aytishicha, eng kichigidan tashqari hammasi hozirda Pokistonda maktabga bormoqda.

Bolalar Angliyada sud qaramogʻiga olingan edi va Surrey grafligi kengashi ularni Pokiston sudlari orqali qaytarib olib kelishga harakat qilayotgan edi.

Ularning bobosi bolalar u bilan qolishi uchun kurashib kelmoqda. Surrey iyun oyida Angliyadagi sud jarayonlari yakunlanayotgani sababli Pokistonda arizani davom ettirish imkoniyatiga ega emasligini aytib, ishdan chekindi.

Shanba kunigacha Pokiston sudlarida ularning vasiyligi boʻyicha yakuniy qaror qabul qilinmagan edi.