Samarqanddan Toshkentgacha 500 kV kuchlanishli elektr uzatish tarmogʻi qurilmoqda

Samarqanddan Toshkentga 500 kV kuchlanishli elektr uzatish tarmogʻi qurilmoqda

Samarqanddan Toshkentga yangi ikki zanjirli 500 kilovoltli (kV) elektr uzatish tarmogʻi qurilmoqda, deb xabar berdi Energetika vazirligi.

Vazirlik maʼlumotlariga koʻra, ushbu yirik loyiha Saudiya Arabistonining ACWA kompaniyasi bilan hamkorlikda Samarqand viloyatining Nurobod tumanida amalga oshirilmoqda. Loyiha 1000 megavattli (MVt) quyosh fotoelektr stantsiyasi, 1336 megavatt-soat (MVt-s) quvvatga ega elektr energiyasini saqlash tizimi hamda yangi 500 kV va 220 kV kuchlanishli uzatish tarmoqlarini oʻz ichiga oladi.

Asosiy tarkibiy qismlardan biri Nurobod tumanidan Toshkent viloyatidagi «Halqa» podstantsiyasigacha boʻlgan 350 kilometrlik tarmoqdir. U Samarqand, Jizzax, Sirdaryo va Toshkent viloyatlari hududidan oʻtadi. Tayanch ustunlarning poydevor ishlari yakunlanib, ularni oʻrnatish boshlandi.

Tarmoq Markaziy Osiyoda ilk bor qoʻllanilayotgan yangi loyihadagi 500 kV kuchlanishli ikki zanjirli tayanch ustunlari yordamida quriladi. Tayanch ustunlari maxsus yangi dizayn asosida yaratilgan boʻlib, ularning texnik yechimlari Hindistonning Larsen & Toubro kompaniyasi tomonidan sinovdan oʻtkazilgan. Natijada, ushbu konstruktsiyalar Markaziy Osiyo energetika infratuzilmasi uchun yangi yechim hisoblanadi.

Loyiha, shuningdek, qoʻshimcha 150 kilometrlik 220 kV kuchlanishli tarmoqni ham oʻz ichiga oladi va uning ishlari taxminan 50 foizga bajarilgan. Uni 2027 yilning may oyida yakunlash rejalashtirilgan boʻlib, bu loyiha doirasidagi uzatish tarmoqlarining umumiy uzunligini 500 kilometrga yetkazadi.

500 kV kuchlanishli «Nurobod — Toshkent Halqa» tarmogʻi qurilishini 2028 yilning birinchi choragida yakunlash koʻzda tutilgan.

«Yangi uzatish tarmoqlari Nurobodda qurilayotgan quyosh stantsiyasi va energiyani saqlash tizimini yagona elektr tarmogʻiga integratsiya qilishga, markaziy hududdagi yangi generatsiya manbalaridan Toshkent shahri, Toshkent viloyati va vodiy viloyatlariga elektr energiyasini yetkazib berish quvvatini kengaytirishga hamda ushbu hududlarda elektr taʼminotining barqarorligi va ishonchliligini oshirishga xizmat qiladi», deyiladi vazirlik bayonotida.

Bundan avvalroq Oʻzbekistonda Markaziy Osiyoda eng yirik deb taʼriflangan energetika obʼyektlari ishga tushirilgani, qarzdorlik tufayli elektr yoki tabiiy gazdan uzilgan isteʼmolchilarni qayta ulash uchun qoʻshimcha toʻlov bekor qilingani hamda elektr energiyasidan masʼuliyat bilan foydalanuvchi tadbirkorlik subʼyektlari uchun 100 foizlik oldindan toʻlov talabi bekor qilinishi haqida xabar berilgan edi.