Samarqandda Oʻzbekiston senatorlari delegatsiyalar bilan uchrashuvlar oʻtkazdi
Senat matbuot xizmati yosh parlament aʼzolari konferentsiyasi doirasida Senat aʼzolari Buyuk Britaniya, Irlandiya va Rossiya delegatsiyalari bilan uchrashganini maʼlum qildi.
Samarqandda Oʻzbekiston senatorlari delegatsiyalar bilan uchrashuvlar oʻtkazdi
Samarqandda boʻlib oʻtayotgan Parlamentlararo ittifoqning Yosh parlament aʼzolarining XII global konferentsiyasi doirasida Oʻzbekiston Senati aʼzolari Buyuk Britaniya, Irlandiya va Rossiya parlament delegatsiyalari bilan uchrashdilar.
Britaniya delegatsiyasiga parlament Jamoatchilik palatasining Xalqaro rivojlanish qoʻmitasi aʼzosi A. Kerns va Tashqi ishlar qoʻmitasi aʼzosi D. Karden vakillik qildi. Ular bilan boʻlib oʻtgan uchrashuvda koʻp qirrali munosabatlarni yanada rivojlantirish va parlamentlararo hamkorlikni mustahkamlash masalalari koʻrib chiqildi.
Irlandiyaning Tadbirkorlik, turizm va bandlik masalalari boʻyicha parlament qoʻmitasi raisi Jeyms O'Konnor boshchiligidagi delegatsiya bilan uchrashuvda parlamentlararo hamkorlikni faollashtirish, IT-texnologiyalar va qishloq xoʻjaligining yangi texnologiyalarini jalb qilish, shuningdek, taʼlim sohasidagi hamkorlik masalalari muhokama qilindi.
Tomonlar, shuningdek, xalqaro parlament tashkilotlari doirasidagi hamkorlikni kengaytirish va Yevropa Ittifoqi bilan sheriklik kontekstida qoʻshma loyihalarni amalga oshirishni koʻrib chiqdilar.
Rossiya Federatsiyasi Federal Majlisi Federatsiya Kengashining Iqtisodiy siyosat boʻyicha qoʻmitasi raisi oʻrinbosari A. Trembitskiy bilan uchrashuvda Oʻzbekiston va Rossiya oʻrtasidagi parlamentlararo munosabatlarni yanada faollashtirish masalalari koʻrib chiqildi.
Ikki davlat rahbarlarining siyosiy irodasi va ishonchli munosabatlari tufayli mamlakatlar oʻrtasidagi hamkorlik har tomonlama strategik sheriklik darajasida rivojlanayotgani taʼkidlandi.