Samarqandda 8 nafar piyodani urib yuborishiga bir bahya qolgan haydovchi jarimaga tortildi
Tashkent Times — bu Oʻzbekistonning barcha soʻnggi yangiliklarini taqdim etuvchi ingliz tilidagi onlayn gazetadir
Samarqandda 8 nafar piyodani urib yuborishiga bir baxya qolgan haydovchi javobgarlikka tortildi
Ijtimoiy tarmoqlarda Samarqandda qora rangli Chevrolet Malibu avtomobili katta tezlikda piyodalar oʻtish joyidan oʻtib, sakkiz nafar piyodani urib yuborishiga bir baxya qolgani aks etgan video tarqaldi.
Hodisa hududdagi kuzatuv kamerasi tomonidan qayd etilgan. Kadrlarda boshqa transport vositalari piyodalarning oʻtishiga yoʻl berish uchun toʻxtagani, piyodalar chizilgan oʻtish joyidan deyarli oʻtib boʻlayotganida qora rangli Malibu toʻxtamasdan oʻtib ketgani aks etgan. Hech kim jabrlanmagan.
Samarqand shahar IIB maʼlumotlariga koʻra, hodisa 8 sentyabr kuni soat taxminan 22:20 larda Mirzo Ulugʻbek koʻchasida yuz bergan. Yoʻl harakati xavfsizligi xodimlari surishtiruvdan soʻng transport vositasi va uning haydovchisini aniqlashdi.
Haydovchi sodir boʻlgan voqeani tushuntirar ekan, shoshilayotganini va tormozi ishlamay qolganini, shu sababli birinchi boʻlakdan uchinchi boʻlakka oʻtib ketganini aytdi.
Haydovchiga nisbatan Maʼmuriy javobgarlik toʻgʻrisidagi kodeksning 128-10-moddasi birinchi qismi (Yoʻl bezoriligi) bilan bayonnoma rasmiylashtirildi. Hozirda u soʻroq qilinmoqda va ish hujjatlari Samarqand shahar sudiga yuborilishi rejalashtirilgan.
Ushbu moddaga koʻra, aybdor deb topilgan shaxslar bir yildan ikki yilgacha boʻlgan muddatga transport vositasini boshqarish huquqidan mahrum qilinishi va bazaviy hisoblash miqdorining 25 baravari, yaʼni 11 million soʻm miqdorida jarimaga tortilishi mumkin.