Saida Mirziyoyeva Namangan viloyatida bolaning zoʻrlanishi bilan bogʻliq fojiaga munosabat bildirdi
Saida Mirziyoyeva Namangan viloyatida bolaga nisbatan zoʻravonlik bilan bogʻliq fojia haqida fikr bildirdi
Oʻzbekiston Prezidenti Administratsiyasi rahbari Saida Mirziyoyeva Namangan viloyatida sodir boʻlgan fojiali voqeaga munosabat bildirib, aybdorlarga nisbatan eng qattiq jazo qoʻllanilishi va qonunchilikni kuchaytirish boʻyicha takliflar tayyorlanishi zarurligini taʼkidladi.
U sodir boʻlgan voqeadan gʻazabda ekanini maʼlum qildi va bunday jinoyatlar uchun oʻlim jazosi qoʻllanilishi kerakligini qayd etdi.
"Amaldagi qonunchilikda bu koʻzda tutilmagani bois, biz javobgarlikni maksimal darajada kuchaytirish maqsadida qonunchilikka oʻzgartirishlar kiritish boʻyicha takliflar tayyorlayapmiz", - dedi Saida Mirziyoyeva.
Administratsiya rahbarining soʻzlariga koʻra, nafaqat bevosita aybdor, balki sovuqqonlik koʻrsatgan va bolaning xavfsizligini taʼminlamagan barcha shaxslar ham javobgarlikka tortilishi kerak.
Avvalroq Namangan viloyatidagi bogʻchalardan birining omborxona mudiri 5 yoshli tarbiyalanuvchiga nisbatan jinsiy zoʻravonlik qilganlikda gumonlanayotgani xabar qilingan edi. Mazkur holat yuzasidan Jinoyat kodeksining 118-moddasi 4-qismi (oʻn toʻrt yoshga toʻlmagan shaxsning nomusiga tegish) va 112-moddasi 1-qismi (oʻldirish yoki zoʻrlik ishlatish bilan qoʻrqitish) bilan jinoyat ishi qoʻzgʻatilgan. Gumonlanuvchi qamoqqa olingan, tergov harakatlari olib borilmoqda.
Ish bolalar ombudsmani nazoratida. Hozirda "Inson" ijtimoiy xizmatlar markazi mutaxassislari qizcha va uning onasiga psixologik, tibbiy va huquqiy yordam koʻrsatmoqda. Bola oilada, ota-onasi qaramogʻida.