Ruminiyada itlarni qutqarish missiyasida boʻlgan ikki ayol halokatda vafot etdi
Hayvonlarni qutqarish tashkiloti itlarni olib ketish paytida yuz bergan toʻqnashuvda ikki xodimi halok boʻlganidan qattiq qaygʻuda ekanini maʼlum qildi.
Ikki nafar britaniyalik ayol Ruminiyada itlarni qutqarish safari chogʻida yuz bergan yoʻl-transport hodisasida halok boʻldi.
Essekslik Reychel Xarvi-Purkiss va Nortgemptonshirlik bir ayol payshanba kuni Serbiya chegarasi yaqinida, xabarlarga koʻra, bir nechta transport vositasi ishtirokidagi toʻqnashuvga duchor boʻlgan.
Ushbu juftlik Buyuk Britaniyada joylashgan «Homeward Bound» hayvonlarni qutqarish guruhi uchun koʻcha itlarini yigʻish maqsadida mamlakatda boʻlib turgan edi. Toʻqnashuvda bir nechta it ham halok boʻlgani aytilmoqda.
«Homeward Bound» tashkiloti Facebook’dagi postida bundan qattiq qaygʻuda ekanini bildirib, ayollarni «ikki goʻzal, noyob olmos» deb atadi.
«Ularning qalbi hayvonlarga boʻlgan cheksiz mehr va gʻamxoʻrlikka toʻla edi», — deya qoʻshimcha qilingan postda.
«Bugun biz sizga tushuntirib bera olmaydigan darajada qaygʻudamiz... iltimos, ushbu dahshatli fojiani hazm qilib olishimiz uchun bizga biroz vaqt bering».
Tashqi ishlar vazirligi ulardan yordam soʻralmaganini, biroq vazirlik xodimlari «xorijdagi Britaniya fuqarolarini 24/7 rejimida qoʻllab-quvvatlashga tayyor» ekanini maʼlum qildi.