Rubio tinchlik muzokaralari «boshi berk koʻchada» ekanini aytdi. Zelenskiy bunda AQShni aybladi
Ukraina prezidenti AQShni nazarda tutgan holda Rossiya bilan qandaydir iqtisodiy loyihalar boʻyicha kelishib olib, diplomatik boshi berk koʻcha haqida gapirish oʻrinsiz ekanini qayd etgan.
Rubio tinchlik muzokaralari «boshi berk koʻchada» ekanini aytdi. Zelenskiy buning uchun AQShni aybladi
Hozircha Rossiya-Ukraina mojarosini tinch yoʻl bilan hal etish uchun imkoniyatlar koʻrinmayapti. Bu haqda AQSH davlat kotibi Marko Rubio Gretsiyadagi «Katimerini» nashriga bergan intervyusida aytib oʻtdi.
Rubio urushda «strategik boshi berk koʻcha» yuzaga kelganini taʼkidladi: Rossiya Donbass ustidan toʻliq nazoratni talab qilishda davom etmoqda, Ukraina esa bunday shartni mutlaqo qabul qila olmaydi.
Rossiya va Ukraina urushida strategik boshi berk koʻcha holati yuzaga keldi. Undan faqat ikki yoʻl bilan chiqish mumkin – yoki muzokaralar stolida kelishish, yoki eskalatsiya. Hozir muzokaralar orqali hal qilish istiqbollari yoʻq, chunki Rossiya oʻz maqsadi – Donbassni toʻliq nazorat qilish ekanini aytmoqda, bu esa Ukraina uchun qabul qilib boʻlmaydigan shartdir. Shuning uchun hozir diplomatik yechim imkonsiz. Biz kelajakda uni topishda ishtirok etishga tayyormiz.
Ukraina prezidenti Volodimir Zelenskiy esa Buyuk Britaniya tashqi ishlar vaziri Ed Milibend bilan birga Chernihiv oblasti Priluki shahrida Rossiya zarbasi oqibatida halok boʻlgan 22 kishini xotirlash uchun kelganida OAV oldida Rubioning bu soʻzlariga keskin javob qaytardi.
«Biz urush paytida juda koʻp turli holatlar haqida eshitganmiz. Juda koʻp chiqish yoʻli yoʻq vaziyatlar, burchakka taqalish va hokazo. Biz oʻzimizni oʻzimiz – odamlar, rahbarlar, siyosatchilar oʻzlarini burchakka siqib qoʻyishadi... bilasizmi, bir tomondan ruslar bilan kelajak uchun qandaydir iqtisodiy loyihalar haqida kelishib olish, ikkinchi tomondan esa biz qandaydir diplomatik boshi berk koʻchada qolganimizni aytish mumkin emas. Biz diplomatik boshi berk koʻchada emasmiz», – dedi Zelenskiy.
U shunchaki Rossiya iqtisodiyotini yopish va Starlink uchun Rossiya osmonini ochish kifoya ekani, ammo amerikaliklar buni qilishni xohlamasligini taʼkidladi.
«Butun iqtisodiyotni yopib qoʻying. Rossiyaning ogʻzini tiking. Ularni oʻz sotuvlaringiz bilan boqmang. Shunchaki ularning qurollariga sanksiya qoʻying. Ukrainaga Starlinkni oching. Eronga javob berayotganingizda ochgan edingiz-ku. U yerda hamma narsa ishladi. Isroil Eron osmonini toʻliq nazorat qildi. Yaʼni, u sizga kerak boʻlganda, ishlaydi. Ular uchun Ukrainaga yordam berish hech gap emas. Va men ochiqchasiga aytdim – bizga bering, osmonni himoya qilish va hukmronlik qilishimizga yordam bering», – dedi Zelenskiy.
Shunda Putin muzokaralar stoliga oʻtiradi. Nega? Chunki hamma narsasini yoʻqotadi. Ikki, uch oy – hammasini yoʻqotadi. Biz esa xitoyliklar analogni ishlab chiqib, ruslarga topshirishini kutmoqdamiz. Xoʻsh, haqiqat qayerda, rostgoʻylik qayerda? Bu yerda boshi berk koʻcha qayerda? Qanaqa boshi berk koʻcha? Bu istamaslik deyiladi.